भांगरभूंय | प्रतिनिधी
भांगरभूंय । प्रतिनिधी
पोरणे गोंयः फोंडें पोस्टांतल्यान काडून वडयल्ल्या सात पोस्टमनांनी शुक्राराक उत्तर गोंयचो खासदार आनी केंद्रीय राज्यमंत्री श्रीपाद नायक हांच्या सां पेंद्र हांगच्या घरा वचून तांकां एक निवेदन भेटोवन कामार परत घेवपा खातीर यत्न करपाची मागणी केली. पोस्टमनां वांगडा तांचे घरचे लोक आशिल्ले.
केंद्रीय दळणवळण आनी म्हायती तंत्रगिन्यान मंत्रालयाक सेवा अटींत बदल करून आमकां परत कामार घेवपा खातीर आपलें वजन खर्च करचें अशें पोस्टमनांनी मागलां. गोंयांतल्या वेगवेगळ्या पोस्ट ऑफिसंनी सुमार 50 गोंयकार कंत्राटी पद्दतीचेर पोस्टमन म्हणून काम करतात. तांकाय कामा वयल्यान काडटले अशी भिरांत ह्या पोस्टमनांनी नायक हांका दिल्ल्या निवेदनांत उक्तायल्या.
श्रीपादभाऊचेर आमचो पुराय विस्वास आसा. केंद्रीय पांवड्यार यत्न करून तें आमकां परत कामार घेवपाक लायतले अशें पोस्टमनांनी पत्रकारां कडेन उलयतना सांगलें. आमका पोस्टमन म्हणून परत कामार घेवप शक्य ना जाल्यार गोंय सरकारान आपकां रोजगार दिवचो अशें पोस्टमन म्हणून काम केल्ल्या संदेश हाणे सांगलें. निवेदन भेटोवपा गेल्ल्या पोस्टमना वांगडा आरजीचो सान्तआंद्रेचो आमदार विरेश बोरकार आशिल्लो. पोस्टमनांक परत कामार घेवपा विशीं आपूण मुख्यमंत्री डॉ प्रमोद सावंत हांचे कडेन उलयलां आनी ते खातीर यत्न करपाचें उतर तांणी आपल्याक दिलां अशें बोरकार हांणी सांगलें. पोस्टमनांक परत कामार घेवपाविशीं आपणेय श्रीपाद नायक हांका निवेदन दिलां अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
