भांगरभूंय | प्रतिनिधी
कोरगांव ः कोरगांवच्या त्या आवय, धुवेक मिशन फाॅर लोकलाचे अध्यक्ष राजेंद्र कोरगांवकार हांणी अर्थीक मजत केली. ते खातीर सावित्री गावडे हिणें तांचे उपकार मानल्यात. हालींच गावडे हांच्यो २८ माडयो आनी २ कवाथे कोणेतरी मध्यानरातीं कापून उडयिल्ले. तांचें उत्पन्नाचें हेर साधन ना. सरकारान ह्या कुटुंबाक मजत करची, तसोच न्याय मेळोवन दिवचो, अशी मागणी थळाव्यांनी केल्या.
आमकां आनीक कोण नात. ह्या उत्पन्नाचेरुय आमी दोगां जगतालीं. फाटलीं १२ वर्सां आमी ह्या झाडांची कुयदाद केल्या. ते मध्यानरातीं कोण तरी झाडां कापता ताचो आमकां आवाज आयल्लो. पूण भियेवन आमी भायर सरुंक नात. सगले कडेन लायट गेल्ल्यान काळोखूय आसलो. सकाळीं उठून पळयत जाल्यार घाम गळोवन वयर काडिल्ल्यो माडयो आनी कवाथे कोणे तरी कापल्यात. सरकारान, पंचायतीन आमकां अर्थीक मजत करपी, तशेंच ह्या वाठाराक सुरक्षा दिवची, अशें सावित्री गावडे हांणी सांगलें.
ज्येश्ठ नागरीक सावित्री हांचीं सगलीं झाडां कापून उडयिल्ल्यान थळावे तिडकल्यात. तांणी ह्या कुटुंबाक तशेंच ह्या वाठारांत पोरसूं, ल्हानशें कुळागर आशिल्ल्या कुटुंबांक राखण दिवची. तशें सावित्री हांकां अर्थीक मजत करची, अशी मागणी केल्या. मजगतीं, राजन कोरगांवकार हांणी मजत केल्या. हेर लोक, क्लब, मंडळांनी मुखार सरुन तांकां मजत करची अशें आवाहन थळाव्या लोकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.