भांगरभूंय | प्रतिनिधी
नवी दिल्ली, खबरां संस्था: हैदराबाद विद्यापीठा शेजरा भुंयखंडा वयलीं झाडां तोडिल्ले खातीर सर्वोच्च न्यायालयान तेलंगण सरकाराक उजरावन काडलें. जर तांकां तांच्या मुखेल सचिवांक खंयच्याय गंभीर कारवाये पसून संरक्षण जाय जाल्यार, तांणी १०० एकर रान परत तयार करपाची येवजण तयार करची, अशेंय न्यायालयान म्हणलां.
कॉंग्रेस सरकारान झाडां मारपाक केल्ले ताकतिकेचेर प्रस्न करीत न्यायमुर्ती बी आर गवई आनी न्यायमुर्ती ऑगस्टीन जॉर्ज मसिह हांच्या खंडपीठान म्हणलें, पर्यावरणाची राखण करपा खातीर आमी कितेंय करपाक फाटीं फुडें पळोवचे नात. कांचा गचिबोवली रान वाठारांतले हे जमनीवेलें एकूय झाड तोडचें न्हय, अशेंय खंडपीठान म्हणलें. न्या. गवई हांणी तेलंगण सरकाराचे वकील अभिशेक सिंघवी हांकां सांगलें, तुमचे कृतीचें समर्थन करपा बदला तुमी ती १०० एकर जमीन कशी परत आशिल्ली तशी करतले, हाची येवजण तयार करप तुमचे खातीर बरें जातलें. ना जाल्यार, तुमच्या कितल्या अधिकार्यांक तेच सुवातेर बांदपी तात्पुरते बंदखणींत वच्चें पडटलें हें आमकां खबर ना.
सर्वोच्च न्यायालयान विचारलें…
सुनावणे मजगतीं न्या. गवई हांणी विचारलें, तीन दिसांच्या सुटयांनी हें करपाची ताकतीक कितें आशिल्ली? सक्षम अधिकार्यांच्या परवानगे बगर व्हडा संख्येन झाडां कशीं मारलीं? आमकां फकत हाचोच हुस्को आसा. बुलडोझर कसो वापरलो? जर तुमकां बांदकाम करपाचें आशिल्लें जाल्यार तुमी प्रक्रिया पाळपाक जाय आशिल्ली. परवानगी घेवपाक जाय आशिल्ली. आमकां फकत पर्यावरणाक जावपी लुकसाणाचो हुस्को आसा.
केंद्रीय सक्षम समितीच्या (सीईसी) अहवालाचेर जाप दाखल करपा खातीर खंडपीठान तेलंगण सरकाराक चार सप्तकांचो वेळ दिलो आनी फुडली सुनावणी १५ मेक दवरली. तांणी अशेंय सांगलें, मजगतीं थंयचें एकूय झाड मारचें ना.
सुनावणेंतले खर मुद्दे…
जनावरां घर सोदीत रानांतल्यान पळून गेल्ल्याचे व्हिडिओ पळोवन आमकां धक्कोच बसलो. हातुंतल्या कांय जनावरांक रस्त्याद सुण्यांनी घास मारले. १०० एकर रान तोडिल्ल्यान त्रासांत पडिल्ल्या जनावरां, सुकण्यांची, सरपटी जिवांची राखण करपा खातीर आमी तेलंगणा राज्यांतले रान जीव वॉर्डनाक चवकशी करपाचे आनी गरजेचीं पावलां उबारपाचे निर्देश दितां.
हैदराबाद विद्यापीठा कडेन संबंद
हैदराबाद विद्यापीठाच्या वाठारांत बांदपी आयटी पार्का खातीर ४०० एकरां वयर पातळिल्लें आदलें रान नश्ट करताले. ३० मार्चाक आयटी पार्कच्या बांधकामा आड निदर्शनां करपी विद्यार्थ्यां मदीं आनी पुलिसां मदीं बरोच बोवाळ निर्माण जालो. पर्यावरणाच्या हुस्क्याक लागून विद्यार्थी ह्या प्रकल्पाक विरोध करताले. जमीन मेकळी करपा खातीर पुलिसांचे हजेरींत डझनभर बुलडोझर हाडले. ह्या वेळार विद्यार्थी आनी पुलिसां मदीं वाद निर्माण जालो.
२ एप्रिलाक सर्वोच्च न्यायालयान विद्यापीठा लागसारचीं ४०० एकर जमिनीवेलीं झाडां मारपाची दखल घेतिल्ली. न्यायालयान तेलंगणा उच्च न्यायालयाच्या रजिस्ट्रारांक घडणूक सुवातेक भेट दिवन अहवाल सादर करपाचे निर्देशूय दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
