भांगरभूंय | प्रतिनिधी
भांगरभूंय । प्रतिनिधी
काणकोणः कोवीडा तेपार रेशनकार्डाचेर लोकांक दिवपाक तूरदाळ विकती घेवपाचो निर्णय मंत्रिमंडळान घेतिल्लो. ही दाळ लोकांक दिली ना आनी गुदावांत ती कुसून पिड्ड्यार जाली. मुख्यमंत्री आनी तेन्नाचो नागरी पुरवण मंत्री गोविंद गावडे आतां नामानिराळे रावून अधिकाऱ्यांक बळीचे बोकडे करपाक सोदतात. आमी तें जावपाक दिवचें नात. आमचे कडेन सगळीं कागदपत्रां आसात आमी न्यायालयांत तशेंच केंद्रीय दक्षता आयोगा कडेन हे दाळ प्रकरण व्हरतले, अशें फातोडडेंचो आमदार आनी गोवा फॉरवर्डाचो सर्वेसर्वा विजय सरदेसाय हांणी सांगलां.
श्रीस्थळ- काणकोणां मल्लिकार्जुन देवळांत श्रावणी सोमारा निमतान दर्शना खातीर आयिल्ले कडेन ते पत्रकारां कडेन उलयताले. तांच्या वांगडा प्रशांत नायक, विकास भगत आनी थळावे फुडारी आशिल्ले. सरकारी गुदावांत जी तूरदाळ आसा ती गोरवांक लेगीत घालपाचे लायकीची ना अशें सद्याचो नागरी पुरवण मंत्री रवी नायक सांगता. मागीर ती लोकांक कशी दितले, कोवीड म्हामारीक लागून कड्डना खातीर लोकांक खूब त्रास जाताले तेन्ना ही दाळ तांकां दिवपाक सरकाराचे हात कोणे बांदिल्ले, अशें प्रश्न सरदेसाय हांणी सरकाराक केल्यात. सरकाराचीी सध्या शहाजनी मानसिकताय जाल्या. ते स्वताक राजा समजतात. गोंय तांकां आंदण दिला अशें ते समजतात अशें तांणी सांगलें.
काँग्रेस पक्ष सध्या हेवतेट उडक्यो मारपी बेवका भशेन जाला. गोवा फॉरवर्ड लोकांच्या हिताचे प्रश्न घेवन मुखार वचत रावतलो. सावंत सरकाराक जाग्यार हाडपाक एकलो विजय सरदेसाय पुरो हें हालींच जाल्ल्या विधानसभा अधिवेशनांत लोकांक दिसून आयलां. आमचे विशीं लोकांच्यो ज्यो अपेक्षा आसात त्यो आमी पुराय करतले. विरोधी आमदारांक विकते घेवप हीच भाजपाची सध्या एक कलमी कार्यावळ जाल्या अशें तांणी सांगलें.
राज्य वित्तीय आयोग, जिल्लो उदरगत समिती, ग्राम उदरगत समिती तशेंच वॉर्ड उदरगत समिती सध्या न्हिद काडटात. 73वे घटना दुरुस्तीक ह्यो समित्यो पाळो दिनात. सत्ताधारी पक्षातले लोक पंचायत वेंचणुकांच्या माध्यमांतल्यान आपल्या घरकान्नींक आनी सोयऱ्यांक राजकारणांत हाडून घराणेशाय प्रस्तापीत करपाक पळयतात. हे लोकांनी थांबोवपाक जाय अशें विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
