भांगरभूंय | प्रतिनिधी
आमदार विजय सरदेसायाचो आरोप, कॅबिनेट नोट व्हायरल
भांगरभूंय I प्रतिनिधी
पणजी : तुरदाळ गुदांवांनी दवरून पेड्डेर जावपाक मुख्यमंत्री डॉ. प्रमोद सावंत आनी तेन्नाचे नागरी पुरवण मंत्री गोविंद गावडे हेच जापसालदार आसात, असो आरोप करून ह्या प्रकरणाची ‘एसआयटी’ वरवीं चवकशी करची, अशी मागणी गोवा फॉरवर्डाचे आमदार विजय सरदेसाय हांणी सोमारा केली.
कोरोना म्हामारी काळांत 400 मेट्रीक टन तुरदाळ खरेदी करपाक मुख्यमंत्री डॉ. सावंत अानी मंत्री गोविंद गावडे हांणी मंजुरी दिल्ली एप्रील 2020तली कॅबिनेट नोट (पत्रक) गोवा फॉरवर्डान सोमारा सोशल मिडिया वरवीं व्हायरल केली. ते उपरांत आमदार विजय सरदेसाय हांणी हाचे वयल्यान परतून एकदा मुख्यमंत्री आनी मंत्री गावडे हांकां लक्ष्य केलां.
मंत्रीमंडळाच्या पत्रका वयल्यान तुरदाळ खरेदीक मुख्यमंत्री आनी नागरी पुरवण मंत्र्यान मंजुरी दिल्ल्याचे स्पश्ट जाता. पूण आतां तुरदाळ पेड्डेर जाल्ल्याचे लक्षांत आयले उपरांत हे दोनूय मंत्री हे प्रकरण अधिकाऱ्यांचेर धुकलपाचो यत्न करतात, अशें सरदेसाय हांणी म्हणलें.
कोरोना म्हामारी काळांत गोंयांत तुरदाळीचो दर कीला फाटल्यान 200 रुपया मेरेन पाविल्लो. जायत्या जाणांक तुरदाळ खरेदी करप पडवपा भायले जाल्ले. अशें स्थितींत सरकारान दरेक कुटुंबाक एक कील तुरदाळ दिल्ली जाल्यार राज्यांतल्या 2.42 लाख कुटुंबियांक ती मेळटा आसली. दोन वर्सां गुदांवांत पडून 242 मेट्रीक टन तुरदाळ पेड्डेर जावची नासली, अशें तांणी नमूद केलां.
मजगतीं, ‘दर खेपे फटींग’ हो भाजपाचो ट्रेडमार्क जाला. ते खातीर भाजप फुडाऱ्यांनी पक्षाचें नांव बदलून ‘भारतीय फटींग पार्टी’ दवरचें, अशी टिका काँग्रेस प्रदेशाध्यक्ष अमीत पाटकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
