भांगरभूंय | प्रतिनिधी
पेडणें, प्रतिनिधी: मांद्रें मतदारसंघांतली वीज समस्या चडशी सुटल्या. मांद्रें जुनस वाडो उपविभागीय वीज स्वतंत्र केंद्र उभारल्या उपरांत विजेच्यो समस्या सुटपाक मजत जाल्या. आतां तुयें आनी पालयें ह्या पंचायत वाठारांत ज्यो समस्या आजूनय आसात त्यो सोडोवपा खातीर थंय लायटीच्यो सरयो घालप गरजेचें. ताका लागून तुयें पंचायत वाठारांत पुराय लायटीच्यो सरयो घालपा खातीर वट्ट १९ कोटी जाल्यार पालयेंच्या पंचायत वाठारांत केबल घालपाक २२ कोटी खर्च जातलो. हे दोनूय खर्च मेळून ४१ कोटी रुपया खर्च करतले अशी म्हायती आमदार जीत आरोलकार हांणी दिली. ते तुयें पंचायत वाठारांतली विजेची समस्या सोडोवपा खातीर पंचायत मंडळ ग्रामस्थ आनी वीज अधिकार्यां वांगडा आयोजीत केल्ले एके म्हत्वाचे बसके वेळार उलयताले.
सोनये पालयेंच्या ग्रामस्थांनी समस्या तांणी आयकून घेतली. ह्या वेळार तांचे वांगडा तुयें सरपंच सुलक्षा नायक, पंच स्विटी नायक, आदले सरपंच किशोर नायक, वीज अधिकारी वाटू सावंत आनी हेर नागरीक हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
