भांगरभूंय | प्रतिनिधी
बेकायदो बांदकामाची चवकशी करपाची मागणी
भांगरभूंय । प्रतिनिधी
पेडणें: तुयें पंचायत वाठारांतल्या डॉन बॉस्को हायस्कुला लागसार 11 ऑगस्टाक बेकायदो दोंगर कापणी आनी झाडां मारपाचें काम चालू आशिल्लें. थळाव्या लोकांनी तें काम आडायलें आनी रान खात्याक तशेंच पुलिशेक हाची म्हायती दिली. उपरांत पुलिसांनी येवन जेसीबी यंत्रणा ताब्यांत घेतली.
तुयें पंचायत वाठारांतल्या दोंगराचेर बेकायदो दोंगर कांपणी आनी झाडां मारपाचें काम व्हड प्रमाणांत चालू आशिल्लें. त्या कामाची पुराय चवकशी करची अशी मागणी आदले सरपंच किशोर नायक, आदले सरपंच उल्हास नायक, आदले पंच उदय मांजरेकार आनी थळाव्या लोकांनी केल्या.
नगरनियोजन मंत्री विश्वजीत राणे हांणी सध्या बेकायदो दोंगर कांपणी, जमीन हस्तांतरण प्रकरणांत लक्ष घातलां. बेकायदो दोंगर कापणेक कसोच भोगशिचो ना, अशी तांणी भुमिका घेतिल्ल्यान तुयेंकारांनी तांकां परबीं दिल्या आनी ह्या प्रकरणांत लक्ष घालपाची मागणी केल्या.
हे सुवातेचेर बांदकाम करपाक पंचायतीन परवानगी दिल्ल्याचें कंत्राटदारान थळाव्या लोकांक सांगलें. त्या वेळार पंचायतीन दिल्लो ना बरकत दाखलो बेकायदो आशिल्ल्याचें थळाव्या लोकांनी सांगलें. तशेंच ह्या विशयाचेर पंचायत मंडळ स्थापन जाले उपरांत खाशेली ग्रामसभा आपोवन ताचेर योग्य तो निर्णय घेतले, अशी म्हायती आदले सरपंच किशोर नायक गांवकार, आदले सरपंच उल्हास नायक, उदय मांजरेकार आनी हेरांनी दिली. योगानंद नायक हांणी सांगलें, पंचायत वाठारांत चलिल्लें हें बेकायदो काम कोणाच्या आशिर्वादान चल्लां, हें सगळ्यांक खबर आसा. सरकारान हें काम बंद करून हातूंत घुस्पल्ल्यांचेर ताकतिकेन कारवाय करची. ह्या जमीन माफिया कडल्यान आमकां जिवेशी मारपाच्यो धमक्यो मेळटात, असोय आरोप तांणी ह्या वेळार केलो.
उदय मांजरेकार हांणी सांगलें, हें बेकायदो बांदकाम ताकतिकेन बंद करपाची गरज आसा. ह्या बांदकामाची चवकशी जावपाक जाय. जीं झाडां मारल्यांत ताचो रान खात्यान हिशेब दिवचो. ते भायर जितलीं झाडां मारल्यांत, तितली लावन दिवची, अशी मागणी केली. चुकीचे पद्दतीन एकादे कंपनीक पंचायतीन जर ना हरकत दाखलो दिला जाल्यार ती सामकी चुकीची गजाल. ताका आमची हरकत आसा, अशें किशोर नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
