भांगरभूंय | प्रतिनिधी
पेडणें: तुयें पेट्रोल पंप लागसार गाडी (जीए ११,टी १६७२) आनी दुचाकी (जीए ३, ए के ६१२५) हांचे मदीं अपघात जावन दुचाकी चलोवपी राज पेडणेंकार (२५) ह्या तरणाट्याक जाग्यारूच मरण आयलें.
चड म्हायती प्रमाण, गाडी तुयां पंपाचेर पेट्रोल घालपाक वळण घेताली. तेन्ना विरुद्ध दिकेंतल्यान दुचाकी घेवन येवपी राज पेडणेंकार हाणें गाडयेच्या सामकार नेटान धपको दिल्ल्यान ताका जाग्यारूच मरण आयलें. राज हो दिवचलचो. तो तुयेंचो भाचो. शिवोले रावतालो. सुरवातेक कांय काळ ताणें गॅरेज चलोवपाचें काम केल्लें. ताचे फाटल्यान एक भाव आनी आवय आसा. भाव बारावे यत्तेंत शिकता. तो परिक्षा दिवपा खातीर गेल्लो.
मांद्रें पुलिसांक हे विशीं म्हायती मेळटक तांणी घडणुकेचो पंचनामो केलो. मोटारीचो ड्रायव्हर सौरव गुडेकार (नेमळें- वेंगुर्लें) हाका पुलिसांनी अटक केल्या.
बरेच गाडयेकार पेट्रोल जाय पडल्यार तुयेंच्या पेट्रोल पंपाचेर वतात. मात जायते फावट पंपा कुशीक ग्रीन नेट लावन तो बंद करतात. हाका लागून टर्न मारतना फुडल्यान वा फाटल्यान येवपी गाडयांचो अदमास येना. गाडयेकाराक आनी दुचाकी घेवन पेडण्यां मार्गान वतचपी राज पेडणेंकाराक गाडी येता हाचो अदमास येवंक नाशिल्ल्यान हो भिरांकूळ अपघात घडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
