भांगरभूंय | प्रतिनिधी
रन फोर युनिटीत मुख्यमंत्र्यांनी घेतलो वाटो
पणजी, प्रतिनिधी : देशात आयज पसून तुकडे तुकडे गँगाचो वावर आसा. ही गँग देशात फुट घालपाचे यत्न करता. प्रधानमंत्री नरेंद्र मोदी हांणी फुट घालपी गँगांची पाळा मुळां नश्ट केल्या, अशें मुख्यमंत्री डॉ. प्रमोद सावंत हांणी म्हणला.
देशाचे आदले गृहमंत्री सरदार वल्लभभाय पटेल हांचो आयज (मंगळारा) जल्मदीस. तांचो जल्मदिस पुराय देशात राष्ट्रीय एकता दीस म्हूण मनयता. सरदार वल्लभभाय पटेल हांचे जल्मदिसा निमतान राज्यांत रन फोर युनिटीच्यो कार्यावळी जाल्यो. साखळे जाल्ले कार्यावळींत मुख्यमंत्री डॉ. सावंत हांणी वाटो घेतलो. हे वेळार उलयताना मुख्यमंत्र्यांनी हें वक्तव्य केलें.
भारतातल्यान ब्रिटीश गेल्या उपरांत देश एकसंध करपाचो वावर सरदार पटेल हांणी केलो. प्रधानमंत्री मोदी आनी गृहमंत्री अमित शाह हांच्या येत्नाक लागून घटनेचें 370 कलम रद्द जालें. हाका लागून जम्मु काश्मिरात तिरंगो हुबोवप शक्य जालें. देशांत एकचार आसलो तरी काय गँगांचे फुट घालपाचे येत्न सुरू आसात. तुकडे- तुकडे गँगां सारख्या संघटणांचीं पाळामुळां नश्ट करपाचो वावर मोदी करीत आसा, अशें मुख्यमंत्री डॉ. प्रमोद सावंत हांणी सांगलें. मुख्यमंत्री डॉ. सावंत हांणी हे वेळार एकचाराचो सोपुत घेतलो.
सरदार पटेल हांचे जल्मदिसा निमतान शिक्षण संस्थांनी आयज रन फोर युनिटीच्यो कार्यावळी जाल्यो.
युथ हॉस्टेल ऑफ इंडियाच्या मडगाव फाट्यान दवर्ली मैदानाचेर रन फोर युनिटीचे आयोजन केल्ले. 300 धांवपटूंनी हे एकता दौडींत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
