भांगरभूंय | प्रतिनिधी
‘हर घर जल’ माेहीम पुराय करपी गोंय देशांतले पयलें राज्य
भांगरभूंय I प्रतिनिधी
पणजी : केंद्रान 2020त ‘हर घर जल’ मोहीम सुरू केले उपरांत फक्त तीन वर्सांत गोंयान ही मोहीम 100 टक्के येसस्वी करून देशभरांत पयली सुवात मेळयल्या. गोंयांत तीन वर्सांत बांदकाम खात्या कडेन 28,114 जाणांनी नळ जोडणे खातीर अर्ज केल्ले. तातूंतल्या 26,186 जाणांक जोडण्यो दिल्यात. 1,928 अर्ज कांय कारणांक लागून प्रलंबीत आसात.
‘हर घर जल’ माेहीम पुराय करपी गोंय हें देशांतले पयलें राज्य थारलां. हे विशीं केंद्रीय जल शक्ती मंत्रालयान ऑगस्ट 2022त प्रमाणपत्र दिल्लें. 2020त केंद्रान ही मोहीम सुरू केल्ली. ते प्रमाण बांदकाम खात्यान 2020-21त वट्ट 6,271 जाणांक नळजोडणी दिली.
2021-22त 9,804, जाल्यार 2022-23त 10,111 जाणांक नळजोडणी दिली. 2021-22 चे तुळेंत 2022-23 ह्या वर्सा 3,840 जोडण्यो चड आसात.
फाटल्या कांय वर्सांनी राज्यांत बांदकाम क्षेत्रांत वाड जायत आसा. ताका लागून नळजोडण्यांच्या प्रमाणांतूय वाड जाल्या. पालिका, पंचायती हांचे कडल्यान ‘हरकत ना दाखलो’ दितात. ताका लागून जायते जाण एकाच घरांत दोन नळजोडण्यो घेतात. ते खातीर जोडण्यांचें प्रमाण वाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
