भांगरभूंय | प्रतिनिधी
घुंवळे वखदां, लिंगीक अत्याचार: तरणाट्यांचें जातलें समुपदेशन
भांगरभूंय I प्रतिनिधी
पणजी : गुन्यांवकारांचेर नदर दवरपाचे आदेश मुख्यमंत्र्यांनी दिल्ले आसतनाच पुलिसांनी तीन ‘ड्रग्ज पेडलर’ हांकां खबरदारीचो उपाय म्हूण एका वर्सा खातीर ताब्यांत घेतल्यात. तांकां वर्सभर पुलीस कोठडेंत दवरतले. हालींच्या दिसांत फाटोफाट खून जावपाचीं प्रकरणां वाडल्यात. पूण गुन्यांवांचें प्रमाण वाडूंक ना. ते फाटल्या तीन वर्सां इतलेच आसा, अशें मुख्यमंत्री डॉ. प्रमोद सावंत हांणी सांगलें.
पुलिसां कडल्यान गुन्यांवांचो तपास योग्य पद्दतीन चालू आसून पुलिसांचे कामगिरीचेर पुराय लक्ष आसा. बुधवारा पुलीस मुख्यालयांत अधिकाऱ्यांची बसका घेतले उपरांत मुख्यमंत्री पत्रकार परिशदेंत उलयताले.
मुख्यमंत्र्यान पुली मुख्यालयांत म्हासंचालक जसपाल सिंग आनी हेर पुलीस अधिकाऱ्यां कडेन तांणी बसका घेतली. कायदो सुवेवस्थेचो नियाळ घेतलो.
पुलिसांनी जुआंव लॉपीस (कळंगूट), अवेलिनो डिसोझा (कळंगूट) आनी वेली डिकॉस्टा (केपें) ह्या तीन ड्रग पेडलरांक ताब्यांत घेतल्या. तांकां एक वर्स पुलिसांच्या देखरेखे खाला बंदखणींत दवरतले. तांचे कडेन आतां घुंवळे वखदां मेळूंक नात. घुंवळे वखदां प्रकरणांत तांचे आड गुन्यांव नोंद जाल्यात. घुंवळे वखदांच्या वेव्हारांत तांचो आस्पाव आशिल्लो. खबरदारीचो उपाय म्हूण पुलिसांनी तांकां ताब्यांत घेतल्यात, अशी म्हायती पुलीस उपअधिक्षक नेर्लोन अाल्बुकर्क हांणी दिली.
2019 सावन फाटलीं तीन वर्सां गुन्यांवांचें प्रमाण जशे आशिल्ले, तशेंच ते आताय आसा. तातूंत वाड जावंक ना. हालीच्या दिसांत फाटोफाट खून जावपाच्यो घडणुको घडल्यात, म्हूण लोकां मदीं भिरांत पातळ्ळ्यां.
स्थलांतरीत कामगार तशेंच भायल्या लोकांचेर नदर दवरपाचे आदेश पुलिसांक दिल्यात. ज्या थळांचेर गुन्यांवकारी घडणुको घडटात, त्या थळांचेर पुलिसांची विशेश नदर आसतली.
पुलीस भरती प्रक्रिया 8 दिसांत
वेंचणूक आचारसंहितेक लागून पुलीस भरतीची प्रक्रिया कांय म्हयने बंद आशिल्ली. आतां ती परतून सुरू जातली. आठ दिसांत ही प्रक्रिया सुरू जातली.
ड्रग्ज घेवप्यां आड गुन्यांव
घुंवळे वखदां विकता तांचें आड गुन्यांव नोंद जातलेच. तशेंच जे कोण घुंवळे वखदांची विकती घेवन सेवन करतात तांचें आड गुन्यांव नोंद जातलो. घुंवळे वखदां आड पुलिसांची मोहीम अदीक खर जातली. आतां मेरेन पुलिसांनी कोट्यांनी रुपयांची घुंवळे वखदां जप्त केल्यात. ह्या घुंवळे वखदांचो विलो लायतले. पार्टी तशेंच हेर सुवातांचेर अचकींत धाडी घालून पुलीस कारवाय करतले, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
