भांगरभूंय | प्रतिनिधी
दवर्ले 7 उमेदवार, रेईश मागूश, कुठ्ठाळीत दरेकी 4 उमेदवार
पणजी : दवर्ली, कुठ्ठाळी आनी रेईश मागूश ह्या तीन जिल्हो पंचायत मतदारसंघां खातीर आयज मतदान. तिनूय मतदारसंघांनी मेळून 15 उमेदवार वेंचणूक रिंगणांत आसात. वट्ट 55 हजार 519 मतदार 15 उमेदवारांचो फुडार आयज थारायतले. सकाळीं 8 ते सांजे 5 वरां मेरेन मतदान जातलें.
कोवीड बादीत मतदारांक सांजे 4 ते 5 ह्या वेळांत मतदानाची संद मेळटली. मतदानाची सगली तयारी पुराय जाल्या. आचारसंहिता भंगाची एकूय कागाळ राज्य वेंचणूक आयोगा कडेन येवंक ना, अशी म्हायती राज्य वेंचणूक आयोगाच्या कर्मचाऱ्यांनी दिली. ही वेंचणूक पक्षीय पांवड्यार जाता. हाका लागून काँग्रेस तशेंच भाजप कार्यकर्त्यांनी त्या त्या मतदारसंघांत प्रचार केलो. पोटवेंचणुके विशीं राज्यांत उमळशीक नासली तरी मतदारसंघांतल्या कार्यकर्त्यां मदीं उमळशीक आसा. तिनूय मतदारसंघांनी वट्ट 74 मतदान केंद्रांचेर मतदान जातलें. तिनूय मतदारसंघांत दादले मतदारां परस बायलां मतदारांचो आंकडो चड आसा. दादले मतदारांचो आंकडो 27,190 जाल्यार बायलां मतदारांचो आंकडो 28,330 आसा.
दोनूय जिल्हो पंचायतींचेर सत्ताधारी भाजपाचो बावटो आसा. हाका लागून पोटवेंचणूक निकालाचो एकंदर राजकी स्थितीचेर कसलोच परिणाम जावचो ना. तरी लेगीत जैत मेळोवप हे त्या मतदारसंघांतल्या आमदारां खातीर प्रतिश्ठेचो विशय आसा. दवर्ली जिल्हो पंचायत मतदारसंघांत उल्हास तुयेंकार हे आमदार म्हूण वेंचून आयिल्ल्यान तांकां जिल्हो पंचायत वांगडीपदाचो राजिनामो दिवचो पडलो. आतां भाजपाचो उमेदवार वेंचून आयलो जाल्यार दवर्ली जिल्हो पंचायतीचेर भाजपाचे वर्चस्व सिद्ध जातले. कुठ्ठाळी जिल्हो पंचायती विशीं लेगीत अशीच गत आसा. जिल्हाे पंचायत वांगडी अँथनी वाझ हे आमदार जाल्ल्यान तांणी जिल्हो पंचायत वांगडीपदाचो राजिनामो दिला. कुठ्ठाळी विधानसभा वेंचणुकेंत काँग्रेस तशेंच भाजपाचे उमेदवार हारिल्ले. ह्या मतदारसंघांत आतां काँग्रेसीक येस मेळटा काय अपक्षूच बाजी मारतात, हे विशीं उमळशीक आसा.
रेईश मागूश जिल्हो पंचायत मतदारसंघ साळगांव मतदारसंघांत येता. केदार नायक हे काँग्रेसीच्या उमेदवारीचेर आमदार म्हूण वेंचून आयल्यात. फाटल्या म्हयन्यांत हेर सात आमदारां सयत तांणी भाजपांत प्रवेश केला. आतां जिल्हो पंचायतींत भाजपाचो उमेदवार जैतिवंत जालो जाल्यार केदार नायक हांचें मतदारसंघा वयलें वर्चस्व सिद्ध जातलें.
दवर्ले सगल्यांत चड 7 उमेदवार
तिनूय मतदारसंघांत मेळून 15 उमेदवार रिंगणांत आसा. दवर्ली मतदारसंघांत सगल्यांत चड 7 उमेदवार आसात. काँग्रेस पक्षान तिनूय मतदारसंघांत उमेदवार दवरल्यात. भाजपान दवर्ली आनी रेईश मागूश, आम आदमी पक्षान (आप) दवर्ली आनी कुठ्ठाळी, भाजपान कुठ्ठाळी मतदारसंघांत उमेदवार दवरल्यात. आपान रेईश मागूश मतदारसंघांत उमेदवार दवरूंक ना.
रेईश मागूश मतदारसंघांत प्रगती पेडणेंकार (काँग्रेस) आनी संदीप बांदोडकार (भाजप) हांचें मदी लडत आसा. राजेश दाबोळकार आनी साईनाथ कोरगावकार हे अपक्ष रिंगणात आसात.
दवर्ली मतदारसंघांत लिओन्सिओ रायकार (काँग्रेस), परेश नायक (भाजप), सिद्धेश भगत (आप), मुर्तुजा कुकनूर (अपक्ष), जुजे डायस (अपक्ष), भगवान रेडकार (अपक्ष) आनी अॅण्ड्रू रिबेलो (अपक्ष) हे उमेदवार आसात.
कुठ्ठाळी मतदारसंघांत काँग्रेस आनी आपाचो उमेदवार आसा. वँलेंट बार्बोजा (काँग्रेस), जॉन डिसा (आप), मर्सिआना वाझ (अपक्ष), लेस्ली गामा (अपक्ष) हे उमेदवार आसात.
दवर्ली मतदारसंघांत सगल्यांत चड मतदार
दवर्ली मतदारसंघ हो सामान्यां खातीर आसा. ह्या मतदारसंघांत रुमडामळ, दवर्ली – दिकरपाल आनी आकें बायश पंचायती आसात. ह्या मतदारसंघांत 10,198 दादले मतदार जाल्यार 9,820 बायलां मतदार आसात. वट्ट मतदार 20,018 आसून 26 मतदान केंद्रांचेर मतदान जातलें.
कुठ्ठाळी मतदारसंघांत 17,034 मतदार
कुठ्ठाळी मतदारसंघांत 7,863 दादले मतदार जाल्यार 9,172 बायलां मतदार आसात. वट्ट 17,034 मतदार उमेदवारांचो फुडार थारायतले. अनुसूचीत जमाती खातीर राखीव आशिल्ल्या मतदारसंघांत 22 मतदान केंद्रां आसात. हे मतदारसंघांत कुठ्ठाळी, केळशी, कांसावली, वेळसांव पाळे आनी चिचोळणें – बोगमाळो पंचायती आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
