भांगरभूंय | प्रतिनिधी
लाखांनी रुपयांचें लुकसाण; शॉर्ट सर्कीट जाल्ल्याचो दुबाव
भांगरभूंय । प्रतिनिधी
म्हापशें: पोरणो बाजार तिस्की सुकूर पर्वरे नवदुर्गा ट्रेडींग ह्या दुकानाक उजो लागून ताचो गोबर जालो. ह्या उज्यांत कटलरी आनी कॅटरींगची आयदना लासून गोबर जाल्यान लाखांनी रुपयांचें लुकसाण जालें. हो उजो शॉर्टसर्कीटाक लागून लागला आसुंये, असो अदमास दुकानाचे धनी तशेंच उजो पालोवपी दळान उक्तायला.
ही दुर्घटणा सोमारा मध्यान रातीर 12.45 वरांच्या सुमाराक घडली. घडणुकेची म्हायती मेळटाच पर्वरी उजो पालोवपी दळाच्या जवानांनी घडणुकेचे सुवातेचेर पावले तेन्ना पुराय दुकान उज्यांत भगभगतालें. दळाचे हवालदार नारायण मंजी, लक्ष्मण परवार, प्रशांत सावळ आनी महादेव नायक हांणी पणजी, म्हापशें आनी पिळर्ण उजो पालोवपी दळाच्या जवानांचे मजतीन फोम आनी उदकाचो वापर करून तीन वरांनी उजो पालयलो. उजो पालय मेरेन दुकानांतल्या सगळ्या वस्तूंचो लासून गोबर जाल्लो. उलचंद भाजापुरी हांचे मालकीचें हें दुकान. तें तांणी भाड्याक घेतिल्लें. सोमारा राती उसरां मेरेन दुकान धनयान जाल्ले लुकसाणेचो आंकडो उजो पालोवपी दळाक दिवंक नाशिल्लो. पर्वरी पुलिसांनी घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
