भांगरभूंय | प्रतिनिधी
एकाच घरांतले वांगडी तरेकवार प्रभागांनी; दोगां आमदारांचो विरोध
पणजी : पंचायत वेंचणुकांक फक्त दोन दीस उरिल्ले आसतनाच उमेदवारांचो प्रचार तेंगशेर पावला. तिसवाडी म्हालांत एकाच घरांतले वांगडी वेगळ्यावेगळ्या प्रभागांनी वेंचणूक लडयतात. हाका लागून पोरणें गोंय, खोर्ली, करमळी, मेरशी, कुडका पंचायतींनी ‘फॅमिली राज’ सुरू जावपाची शक्यताय आसा. कुमारजुंवें तशेंच सांत आंद्रें मतदारसंघातल्या आमदारांनी मात फॅमिली राजाक विरोध आशिल्ल्याचें म्हणलां.
राज्यांतल्या 186 पंचायतींनी बुधवारा 10 ऑगस्टाक मतदान जातलें. ताचो जाहीर प्रचार आयज (सोमारा) सोंपता. प्रचाराच्या निमाण्या पांवड्यार उमेदवार समर्थकां सयत मतदारांक मेळून आपले वटेन ओडपाचे यत्न करतात. हाका लागून प्रचारांत रंगत आयल्या.
पंचायत वेंचणुकेंत घराणेशाय वा फॅमिली राज नवे न्हय. पंचायतींनी घोव- बायल, भाव-भाव, बापूय- पूत एकाच पंचायतीचे पंच आसतात. प्रभाग बायलां खातीर राखीव जालो जाल्यार त्या प्रभागांत शेक आशिल्लो उमेदवार आपले बायलेक उमेदवार म्हूण उबी करता. सरपंचपद बायले खातीर राखीव जालें जाल्यार सरपंचपदाचो उमेदवार बायल वा समर्थक बायलेक सरपंचपदाचेर बसयता. फाटलीं कितलींशींच वर्सां हे प्रकार चलत आयल्यात.
तिसवाडी म्हालांत 18 पंचायती आसात. पणजी, ताळगांव, सांता क्रूझ, सांत आंद्रें, कुमारजुंवें हे पांच मतदारसंघ तिसवाडी म्हालांत येतात. पणजी म्हापालिका आशिल्ल्यान मंत्री बाबूश मोंसेरात हांचो पंचायत वेंचणुकां कडेन प्रत्यक्ष संबंध येना. कुंमारजुंवें मतदारसंघांत सात पंचायती आसात. पोरणें गोंय पंचायतींत चार प्रभागांनी चडशीं घोव-बायल वेंचणूक लडयतात. विनायक फडते (प्रभाग 6) आनी प्रज्ञा फडते ( प्रभाग 4), निळकंठ भोमकार (प्रभाग 8) आनी नम्रता भोमकार (प्रभाग 5), विशाल वळवयकार (प्रभाग 6) आनी सई वळवयकार (प्रभाग 9), संदेश माशेलकार (प्रभाग 5) आनी संध्या माशेलकार (प्रभाग 4) हीं घोव-बायल वेंचणुकेच्या रिंगणांत आसात.
खोर्ली पंचायतींत लेगीत चडशीं घोव-बायल वेंचणुकेच्या रिंगणांत आसात. गोरखनाथ केरकार आनी सुप्रिया केरकार, कायतान पो आनी फ्रीडा पो, अल्बिनो सिक्वेरा आनी वोनी सिक्वेरा हीं जोडपीं वेंचणूक लडयतात. करमळी पंचायतींत विल्सन वालादारीस (प्रभाग 1) आनी अँजेला वालादारीस (प्रभाग 7) वेंचणुकेच्या रिंगणांत आसात.
घोव, बायल आनी धूव लडयतात वेंचणूक
सांता क्रुझ मतदारसंघातल्या चिंबल पंचायतींत घोव-बायल आनी धूव वेंचणुकेच्या रिंगणांत आसात. घरकार मोहन नार्वे, घरकान्न मोहिनी नार्वे आनी धूव सुजाता नार्वे वेंचणूक लडयतात. मोहन नार्वे (प्रभाग 2), मोहिनी नार्वे (प्रभाग 4) आनी सुजाता नार्वे (प्रभाग 1) वेंचणुकेच्या रिंगणांत आसात.
ते भायर बरींच वर्सां सरपंच आशिल्ले चंद्रकांत कुंकळकार हे प्रभाग 5 तल्यान वेंचणूक लडयतात. तांचे पूत पुंडलीक हे प्रभाग 6 त उमेदवार आसात. सांता क्रुझ पंचायतींत लक्ष्मण बांदोडकार आनी शिल्पा बांदोडकार हें जोडपें रिंगणांत आसा. ते भायर मारियानो आरावजो आनी पीटर आरावजो हे भाव वेगळ्यावेगळ्या प्रभागांतल्यान वेंचणूक लडयतात.
मेरशी पंचायतींत अनील होबळेची घरकान्न संध्या होबळे आनी भाव लवू होबळे वेंचणूक लडयतात.
सांत आंद्रे मतदारसंघात सात पंचायती आसात. सांत आंदऱ्यां लेगीत घोव-बायल आनी भाव तरेकवार पंचायतींनी वेंचणूक रिंगणांत आसात. गोवा वेल्हा पंचायतींत थाॅमस कार्वाल्हो आनी लिनेट कार्वाल्हो (घोव-बायल) रिंगणांत आसात. तशेंच लिनेटाचो भाव अल्फ्रेड मेंडीस हो लेगीत दुसऱ्या प्रभागांतल्यान वेंचणूक लडयता. फ्रान्सीस डिसोझा आनी करोलिना डिसोझा हीं बापूय आनी धुवेची जोडी वेंचणुकेंत आसात. कुडका पंचायतींत घोव सुभाष शिरोडकार हो पांच प्रभागांत जाल्यार बायल सुषमा ही प्रभाग चारांतल्यान वेंचणूक लडयता. आगशी पंचायतींत आदले आमदार फ्रान्सीस सिल्वेरा हांचो पुतणयो अॅलन सिल्वेरा हो प्रभाग एकांतल्यान बिनविरोध वेंचून आयला. फ्रान्सीस सिल्वेरा हांचो भाव बेनी सिल्वेरा हो प्रभाग दोनांतल्यान वेंचणूक लडयता.
तिसवाडी म्हालांत घोव-बायल, भाव तशेंच बापूय- धूव वेंचणुकेंत आसात. आतां मतदार घराणेशायेक मान्यताय दितात काय ना हें मात निकाला वेळार कळटलें.
म्हाका घराणेशाय नाका: विरेश बोरकार
हांवें एका घरांतल्या दोगांक उमेदवारी दिवंक ना. घराणेशाय म्हाकाय नाका. रिव्होल्युशनरी गोवन्स ह्या म्हज्या पक्षाचो लेगीत घराणेशायेक विरोध आसा अशें सांत आंद्रेंचे आमदार विरेश बोरकार हांणी सांगलें.
एका घरांतल्या दोगांक तेंको ना: राजेश फळदेसाय
एका घरांतल्या दोगांक म्हजो तेंको ना. तरी ओबीसी उमेदवार नाशिल्ल्यान विशाल वळवयकार हाका तेंको दिवचो पडलो अशें कुमारजुंवेंचे आमदार राजेश फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
