भांगरभूंय | प्रतिनिधी
मडगांव, प्रतिनिधी ः तिसरो जिल्हो तयार केल्यार गरीब तशेंच ज्येश्ठ नागरिकांक फायदो जातलो. भलायकी सुविधा वाडटली. प्रशासकीय कामा बेगीन जातली. जिल्हाधिकारी इमारत बांदपाखातीर जमनी उपलब्ध आसात. हाचे भायर केंद्रा कडल्यान उदरगती खातीर चड निधी मेळूंक शकता. मुख्यमंत्री डॉ. प्रमोद सावंत हांणी तिसरो जिल्लो करपाचो निर्णय लोकांच्या बरे खातीर घेतला अशें मत शेतकी मंत्री रवी नायक हांणी उक्तायलें.
तिसरो जिल्लो तयार करपा विशीं उलयतना मंत्री नायक हांणी सांगलें, फोंडें हो तिसरो जिल्लो करपाची आपली मागणी खूब वर्सां सावन आसा. तिसरो जिल्लो जाल्यार ताचो फायदो गरीब लोकांक चड जातलो. ज्येश्ठ नागरिकांक कामाक लागून पणजे वा मडगांवां वचचें पडटा. गांवांतल्या लोकांक प्रशासकीय कामांचो अणभव नासता आनी ते दुसरे सुवातेर गेल्यार कामांत समस्या येतात. हाचे भायर तिसरो जिल्लो तयार केल्यार केंद्र सरकारा कडल्यान आनी राज्य सरकारा कडल्यान चड निधी हाडूं येता. तिसरो जिल्हो घडोवपा खातीर राज्य सरकारान समिती स्थापन केल्या. सर्वे केल्या उपरांत अहवाल सादर करतले अशें मंत्री नायक हांणी सांगलां.
जमनी विक्री वेव्हाराचेरूय नदर दवरतले: मंत्री नायक
तिसरो जिल्लो आसल्यार प्लॉट विक्रीच्या प्रकरणांचेर नदर दवरून सुवात सांबाळपाचें काम करूं येता. फोंडें हांगा उपजिल्हो हॉस्पिटल आसा. त्या हॉस्पिटलाचो दर्जो वाडटलो आनी भलायकी सुविधा चड वाडटली. फोंड्या जिल्हाधिकारी कार्यालया खातीर इमारती आसा. तशेंच नवी प्रशासकीय इमारत बांदपाची आसल्यार सरकारी सुवातूय उपलब्ध आसा. हांगा वेगवेगळीं सरकारी कार्यालयां एकाच जाग्यार येवंक शकतात. जिल्लो पंचायत तयार जातली आनी राज्यांत खासदारूय वाडूंक शकता अशेंय मंत्री नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
