भांगरभूंय | प्रतिनिधी
उदकाचो विसर्ग सुरू, दोडामार्गार उटंगाराचो पावस
भांगरभूंय । प्रतिनिधी
दिवचल : मंगळार सावन सुरू जाल्ल्या उटंगाराच्या पावसान बुधवारा दोडामार्ग म्हालाक झोड दिलो. ताका लागून खूबश्या गांवांतली लोकजीण विस्कळीत जाली. दिवचल म्हालांत उटंगाराचो पावस चालू आसा आनी एकसारकी न्हंयेची पातळी वाडटा.
तिळारी धरणाची नियोजीत पातली पुराय जाले उपरांत बुधवारा दनपारां 2.50 वरांच्या सुमाराक तिळारी धरणाच्या उदकाचो विसर्ग सुरू जाला. खळग्यांतलो सांड कानालांतल्यान तिळारी न्हंयेंच्या पात्रांत धरणाचें उदक पावलें. हाका लागून तिळारी न्हंयेच्या पात्रांतल्या उदकाची पातळी आनीक वाडटली. हे खातीर न्हंयेदेगे वयल्या गांवांक शिटूक रावपाची शिटकावणी दिल्या.
दोडामार्ग म्हालांत पावसान नेट धरला. बुधवारा जाल्यार सकाळ सावन पावसान धुमशेण कांडलें. उटंगाराचो पावस आनी मदीं वादळीं वाऱ्याक लागून कांय कडेन किरकोळ पडझडीच्यो घडणुको घडल्यो. मे म्हयन्यांत पावसाक सुरवात जाल्ली, ताका लागून तिळारी धरणांतल्या उदकान जुलय म्हयन्याच्या पयल्या दोन दिसांनीच पातळी मेळयली. धरणांतलें अतिरिक्त उदक भायर सोडपी चारूय दारां वयर उखल्ल्यांत. धरणाच्या वाठारांत जाल्ल्या पावसाक लागून नियोजीत उदकाची पातळी 106.70 ही बुधवारा दनपारां 2.50 वरांच्या सुमाराक पुराय जावन अतिरिक्त उदक पुच्छ कानालांतल्यान न्हंयेंच्या पात्रांत वचून मेळ्ळें. उटंगाराच्या पावसाक लागून तिळारी न्हंय तशेंच साटेली, भेडशी न्हंय उपाट भरून व्हांवतात.
न्हंयेदेगे वयल्या लोकांक उलो
बुधवारा तिळारी धरणांतल्यान उदकाचो विसर्ग सुरू जाला. ते खातीर न्हंयेदेगेर आशिल्ल्या तिळारी, कोनाळ, घोटगे, घोटगे वाडी, परमे, साटेली, भेडशी, आवाडा, वायंगणतड, कुडासे, वानोशी, मणेरी, सासोली ह्या गांवांतल्या लोकांक शिटूक रावपाची शिटकावणी दिल्या. तिळारी न्हंयेच्या पात्रांत खंयच्याय खिणाक अचकीत उदक वाडपाक शकता, ताका लागून कपडे उमळपाक वा गोरवांक घेवन वच्चें न्हय. न्हंयेच्या पात्रांत आशिल्ल्या कॉजवे वयल्यान प्रवास करचो न्हय, असो उलो उदकास्रोत विभाग कार्यकारी अभियंते विनायक जाधव हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
