भांगरभूंय | प्रतिनिधी
बाल ग्रामसभा
आदल्या तेंपार भुरगें आठ वर्सांचें जालें काय कपड्याचें दप्तर, तातूंत पाटी आनी पेन्सील घालून ताका शाळेंत भरती करताले. शाळाय तेन्ना एक- दोनूच आशिल्ल्यो. दर म्हयन्याक पांच- धा रुपया फी आसताली. पयशेकारांचीं भुरगीं शिकतालीं आनी बाकीचीं घराच मस्ती करीत दीस धुकलतालीं. गोंयचे पयले मुख्यमंत्री भाऊसायब बांदोडकार हांणी तळागाळांत सरकारी शाळा बांदल्यो आनी मागीर सगलेच भुरगे शाळेंत वचपाक लागले. पाटी, पेन्सिलीचो जागो पुस्तक, चोपडी, पेनान घेतलो. खुबशे बदल जायत गेले. पुस्तकी शिक्षणा वांगडा बाकी हेर भाशांचें शिक्षण शाळांनी दिवपाक लागले. चित्रकला, रंगकाम, मातीकाम, रांगोळी घालप अशे तरेचे बरेच उपक्रम सुरू जाले.
मदले सुटयेंत शाळेच्या मैदानाचेर भुरग्यांक खो- खो, फुटबाॅल, हाॅलिबाॅल, क्रिकेट, धरचेल्यांनी असले मैदानी खेळ खेळपाक परवानगी दिली. ताका लागून तांचे कुडीची हालचाल जावंक लागली. नकळटां व्यायामूय जालो. तांची सर्वांगी उदरगत जाली. भुरग्यांची रोगप्रतिकार शक्त वाडली. खेळ्ळे उपरांत घरा वतकच चुरचुरून भूक लागताली. जेवणूक बरें वतालें.
सध्या शाळानी बाल ग्रामसभा घेवपाची पद्दत सुरू जाल्या. ह्यो बालग्रामसभा पंचायतींतूय घेवपाक जाय. पांच ते आठ वर्सां पिरायेचीं भुरगीं हे ग्रामसभेंत वांटेकार जावंक शकतात. तांचे प्रस्न, तांचीं मतां समाजा मुखार येवचे. तांकां आपल्यो अडीअडचणी बालसभे मुखार मांडपाचो अधिकार मेळूंक जाय. भुरग्यांच्यो सगल्यो समस्या मांडपी ही फक्त भुरग्यांची संस्था, अशें म्हणू येता.
बालग्रामसभा ही पंचायत हाॅला वांगडा सरपंच, पंच, सचीव हांचे देखरेखे खाला जावप बरें. भुरगीं बिनधास्त आपल्यो मागण्यो मांडूं शकतलीं. पंचायतीन ह्या भुरग्यांक रानाची सफर घडोवन हाडपाक जाय. झाडां वेलींची, सुकण्यांची म्हायती तांकां दिवंक जाय. तांकां वाचनाची आवड लावपाक जाय. मैदान, इनडोर स्टेडियम, व्यायामशाळा जाय. तांकां संगणकाचें शिक्षण दिवंक जाय. बालसभेन असले निर्णय घेवप सामकें योग्य थारतलें. बालसभेंत गांवचे मुखेल वावुरपी, पुलीस अधिकारी, जाणकार व्यक्ती आसप बरें. तांचेंय मार्गदर्शन भुरग्यांक मेळटलें.
बालग्रामसभा म्हणजे भुरग्यांचें हक्काचें व्यासपीठ. तातूंत भुरगीं आपल्या शिक्षणीक, समाजीक, अर्थीक समस्यां विशीं उलोवंक शकतलीं. समाजाक तीं हम भी कुछ कम नहीं हें दाखोवन दिवंक शकतलीं.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
