भांगरभूंय | प्रतिनिधी
मिनीन दे बांदार: एम. ई. एस. महाविद्यालयांत जालो अभिनय प्रमाणपत्र अभ्यासक्रम
वास्को: तियात्र हो नाट्य कलेचो आगळो वेगळो प्रकार. तियात्रांत संगिताचो आस्पाव व्हडा प्रमाणांत जाल्लो दिसता. जो कलाकार जितक्या सहजपणान पात्रांच्या मनांतले भाव अभिव्यक्त करता तितलोच तो बरो कलाकार म्हणून नांवां रुपाक येता. अशा कलाकारांच्या अभिनया उपरांत प्रेक्षक खोशयेन आनी उमेदीन भरता. देखून अभिनय फक्त कलाकारां पुरतो मर्यादीत नासून तो प्रेक्षकां मेरेन पावता तेन्नाच ताका न्याय मेळटा, अशें गोंय तियात्र अकादेमीचे अध्यक्ष मिनीन दे बांदार हांणी सांगलें.
जुवारीनगरच्या एम. ई. एस. महाविद्यालयाच्या कोंकणी विभागान तियात्र अकादेमी, गोंय हांच्या जोड पालवान हालींच धा दिसांचो अभिनय प्रमाणपत्र अभ्यासक्रम घडोवन हाडलो. अभ्यासक्रमाच्या उक्तावण सुवाळ्याक मुखेल सोयरे ह्या नात्यान मिनीन दे बांदार उलयताले. तांणी दिवली पेटोवन कार्यावळीचें उक्तावण केलें.
ह्या वेळार माचयेर मुरगांव शिक्षणीक संस्थेच्यो भांडारी ललिता जोशी, गोंय तियात्र अकादेमीचे उपाध्यक्ष सुकूर दे सांताक्रूझ, कार्यशाळेचे मार्गदर्शक मायकल ग्रासियस, माथायश मास्करेन्हास, गोंय तियात्र अकादेमीचे वांगडी सचीव सुरेश दिवकार, कोंकणी विभाग मुखेली डॉ. कॉज्मा फेर्नांडीस हाजीर आशिल्ले. सुरवातेक प्रा. प्रिती परब हांणी मानेस्तांक फुलां भेटयलीं.
सुरवातेक उप-प्राचार्य डॉ.आशिष जोशी हांणी येवकाराचें उलोवप केलें. विभाग मुखेली डॉ. कॉज्मा फेर्नांडीस हांणी वळख आनी प्रास्तावीक केलें. प्रा. सत्यवान नायक हांणी सुत्रसंचालन केलें जाल्यार प्रा. अंबर नायक हांणी उपकार मानले.
ह्या वेळार प्रमाणपत्र अभ्यासक्रमाच्या मजगतीं घडिल्ल्या खिणांचें चलचित्र दाखयलें. तशेंच विद्यार्थ्यांच्या चार पंगडांनी नाटकुलीं सादर केलीं. तशेंच अभ्यास क्रमा मजगतीं शिकयल्लें एक कांतार विद्यार्थ्यांनी सादर केलें. अभ्यासक्रमा विशीं विद्यार्थ्यांनी आपल्यो प्रतिक्रिया उक्तायल्यो. तातूंत लियोन फेर्नांडीस, एन. डिसौझा हांचो आसपाव आसलो. ताचे उपरांत विद्यार्थ्यांक प्रमाणपत्रां भेटयलीं आनी तशेंच वेदिवेल्या मानेस्तांक यादस्तिकां भेटयलीं. सुवाळ्याचें सुत्रसंचालन प्रा. अंबर नायक जाल्यार उपकार प्रा. सत्यवान नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
