भांगरभूंय | प्रतिनिधी
मडगांव: नामनेचे कॉमेडियन तियात्रिस्ट सॅल्वी म्हणून वळखुपी वेळ्ळी हांगासरले मॅथ्यूज कुरैय्य (48) हांकां काल (सोमारा) सकाळीं मरण आयलें. फाटल्या सोमारा तांकां अस्वस्थ दिसूंक लागले उपरांत सॅल्वी हांकां उपचारा खातीर गोंय वैजकी म्हाविद्यालयांत दाखल केल्लो. उपचारा वेळार थंयच तांकां मरण आयलें.
तांच्या मरणा उपरांत मुख्यमंत्री डॉ. प्रमोद सावंत हांचे सयत खूबशा जाणांनी दुख्ख उक्तायलें. तांचे फाटल्यान घरकान्न, दोन भुरगीं असो घराबो आसा.
तियात्रिस्ट सॅल्वी हांकां मडगांवां रवींद्र भवनांत पाय तियात्रिस्ट सभाघरांत आयतारा 17वेर ‘8 दीस’ हो तियात्र सादर करता आसतनाच अस्वस्थ दिसूंक लागिल्लें. ह्या कारणान तांकां रोखडेच दक्षीण गोंय जिल्हो हॉस्पिटलातं दाखल केल्लो. उपरांत दुसर्याच दिसा म्हणल्यार सोमारा तांकां गोमॅकाँत दाखल केले.
थंय तांचेर सप्तकभर उपचार सुरू आशिल्ले. पूण काल सकाळीं उपचार सुरू आसतनाच तांकां मरण आयलें.
मजगतीं, साश्ट म्हाला सयत गोंयभरांतल्या तियात्र आनी कला मोगीं सयत विवीध मळा वयल्या लोकांनी दुख्ख उक्तायलां. सॅल्वी हांची कूड वेळ्ळी हांगासरल्या तांच्या घरा हाडले उपरांत सोयरे आनी बरें मागप्यांनी तांचे कुडीचें निमाणे दर्शन घेतलें. तांचे कुडीचेर 27 जुलय दिसा सांजवेळा 4 वरांचेर वेळ्ळी हांगासरे चर्चींत निमाणे संस्कार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.