भांगरभूंय | प्रतिनिधी
14 उमेदवारांक फक्त एक मत, 187 जाणांक 10 च्या भितर मतां
भांगरभूंय I प्रतिनिधी
पणजी : पंचायतींच्यो वेंचणुको मतपत्रिका वरवीं जावनूय तीन उमेदवारांक एकूय मत पडूंक नाशिल्ल्याचे मुखार आयला. तशेंच 14 उमेदवारांक फक्त एक मत, जाल्यार 187 जाणांक 10 परस उणीं मतां पडिल्ल्याचे निकालांतल्यान उक्तें जालां.
विधानसभा, लोकसभांच्याे वेंचणुको ईव्हीएम मशिना वरवीं जातात. तातूंत घोळ घावपाक मेळटा, असो दावो करून गोंय सयत देशभरांतल्या विरोधी पक्षां कडल्यान ह्यो वेंचणुको लेगीत मतपत्रिके वरवीं घेवपाची मागणी जाता. पूण राज्यांत हालींच जाल्ल्या पंचायत वेंचणुकां खातीर रिंगणांत आशिल्ल्या तिगां उमेदवारांक एकूय मत मेळूंक ना. हातूंत त्या उमेदवारान स्वताचें मत लेगीत स्वताक दिवंक ना काय? असो प्रस्न उपस्थीत जाला.
राज्य वेंचणूक आयोगान जारी केल्ल्या निकाला प्रमाण बार्देस म्हालांतल्या हणजूण पंचायतींतलो प्रभाग 8, साश्टींत वार्का पंचायतींतलो प्रभाग 7, आनी पेडणें म्हालांतल्या वारखंड पंचायतीच्या प्रभाग 1 तल्या उमेदवाराक एकूय मत मेळूंक ना. फक्त एक मत मेळिल्ल्या उमेदवारांची संख्या 14 आसा. दिवचलेंतल्या आमोणा पंचायतींचो प्रभाग 4त, शिरगांव पंचायत प्रभाग 5, कोलवाळ पंचायत प्रभाग 9, पर्रा पंचायत प्रभाग 4, सारझोरा पंचायत प्रभाग 2, मोर्लें पंचायत प्रभाग 1, करमळी पंचायत प्रभाग 1, मडकय पंचायत प्रभाग 7, धारगळ पंचायत प्रभाग 3, पालयें पंचायत प्रभाग 1, सांकवाळ पंचायत प्रभाग 5, बाळ्ळी पंचायत प्रभाग 6 तशेंच फातर्पा आनी नाकेरी पंचायत प्रभाग एकांत दरेकी एका उमेदवाराक फक्त एकूच मत पडिल्ल्याचें निकालांतल्यान दिसून आयला.
10 परस उणीं मतां पडिल्ल्यो पंचायती
पेडणें : 15
दिवचल : 14
बार्देस : 56
तिसवाडी : 22
सत्तरी : 8
फोंडें : 16
साश्ट : 27
मुरगांव : 10
धारबांदोडें : 2
सांगें : 3
केपें : 12
काणकोण : 2
वट्ट : 187
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
