भांगरभूंय | प्रतिनिधी
मिशन मंगळ सिनेमाचो पयलोच सीन. विद्या बालन धांवत पळत सगळ्यां खातीर नाश्तो तयार करता, बोवाळांत सोंपिल्ले पेस्टीच्या ट्युबांतल्यान हातांतल्या लाठणेन पेस्ट भायर काडटा, घरांतली हेर ल्हान सान कामां करत, घोव, मांवाक सुचोवण्यो दीत ती घरांतल्यान भायर सरता आनी थेट आपल्या कार्यालयांत पावता. कार्यालय खंयचे? राष्ट्रीय विज्ञान संस्था! आनी थंय ती विज्ञानीक. मनांतल्या मनांत कितलेशेच जाणांनी ताळयो मारल्या आसतल्यो. व्वा! कितें घर, कुटूंब आनी काम सगळें ती एकठांय सांबाळटा?
चित्रपटाच्या फुडल्या एका पांवड्यार तिची धूव रातची घरांत पावली ना म्हणून तिचो घोव तिका थोमणे मारता तेन्ना ती म्हणटा, म्हजे काम म्हाका खूब आवडटा आनी म्हाका ते बाबतीन कसलेंच अपराधीपण (गिल्ट) ना. आनी तितलेच तांकीन ती आपले धुवेचो पत्तोय सोदून काडटा. परत मनांतल्या मनात आमी ताळयो मारल्या आसतल्यो. ती गिल्टी नासपा खातीर न्ही, तिणे धुवेक सोदून काडली म्हणून.
आयज मेरेन आमी बायलेक अश्योच मनांतल्या मनांत ताळयो मारल्यात आनी तिणेय मनांतले मनांत थारावन उडयलां, हांव सगळें करपाक शकता. मात ह्या सगळ्या भितर तिचे गूण, तिची क्षमता आनी सगळ्यांत महत्वाचें म्हळ्यार तिच्या मदली फुडारपणाची कळाशी तीं दिसान दीस विसरत आसा. मंगळाचेर पावली तरीय…
बायलेन आयज मेरेन जेन्ना जेन्ना उंचेल्या पदाचेर मजल मारल्या तेन्ना तिका फाटी ओडपाचें कितलेशेच प्रकार घडल्यात. इंदिरा गांधीक ‘गुंगी गुडीया’ म्हणपी तेन्नाय आशिल्ले आनी आयजय तिच्या कर्तृत्वाक नानपयत करपाक सोदपी आसात. हातूंत राजकारणा बरोबर लिंगभेदय भरसला हें आमी न्हयकारपाक शकतात व्हय? देशाच्या सुरक्षा मंत्री आनी अर्थ मंत्री पदाचेर बायलांक पळोवन भोंवयो उंचावपी खूब जाण आसतले, मात तांचो थंय मेरेनचो प्रवास आमी न्हयकारपाक शकतात? त्या त्या पदांचेर पावतकर मनशाच्या क्षमेतेचो नियाळ मुजरत घेवचोच मात त्या नियाळाक लिंगाच्या भिंगातल्यान पळयतले जाल्यार मागीर आमची प्रगती शुन्य मोलाचीच म्हणचें पडटलें.
देशाच्या राष्ट्रपतीक ‘पत्नी’ म्हणिल्ल्याचो खूब बोवाळ जालो. तो बोवाळ कितलो गरजेचो आशिल्लो आनी ताचे फाटल्यान कोणाच्यो कितल्यो भावना आसात, हो वेगळो विशय पूण जगभरांतल्या कांय पदांक आनी स्थानांक दिल्लीं नांवां पळयल्यार थंय मेरेन बायल केन्ना पावचीच ना हीच तर भावना आशिल्ली आसूंक जाय. आयज परिस्थिती बदल्ले उपरांत लेगीत आमकां ही पद नांवां बदलपाक कुस्तार जावप म्हळ्यार आमचे तकलेंत घट्ट रुजिल्ली असमानतायेचीं बियां अजुनय हुमटून वचूंक ना हाचीच गवाय न्हय?
बायल उंचेल्या पदांचेर पावले उपरांत तिचो कोण तरी वाली आसतलो, अशी विधानां सरसकट करपी लोक आमी पळयतात. ‘गाॅड फादर’ ह्या उतराक आयज नसाय आनी तिरस्काराचोच वास चड येता. तिच्या यत्नांक, तिच्या परिश्रमांक खिणांत ना करपाचो यत्न जाता. राजकारण आनी हेर कितल्याशाच क्षेत्रांनी दादल्यांकय अशे वाली आयज कमी नात. मात, मुळांत समस्येचेर आघात करचे परस आमकां थंयूय आमच्या लिंगीक असमानतायेचीच री ओडप सोयिस्कर जाता.
हाचे उरफाटे सहाय्य आनी आदाराच्यो सकारात्मक काणयो मात आमी सहज पेल्यान काडटात. इन्फोसिसाचे नारायण मुर्ती हांकां कंपनी सुरू करपाची आशिल्ली तेन्ना तांकां आनी तांच्या इश्टांक आर्थीक आदार करपी सुधा मुर्ती आमकां केन्नाच कित्याक उर्बा दिना? दर एका येसस्वी मनश्या फाटल्यान एक बायल आसा म्हणपी समाज ती फाटल्यान न्हय, दादल्याच्या सांगातान चलता म्हणपाचें सदांच विसरता.
बायलो दादल्याच्या मुखार पावतल्यो असो एक भंय ह्या समाजाक सदांच दिसत आयला. सर्त नासून लेगीत एक अदृश्य सर्तीच्या भंयान तो बायलेक फाटीं ओडटा. बायल मुखार पावलीय जाल्यार कितें मळब कोसळटलें हे अजुनय ह्या समाजाक लेगीत सारकें समजूंक ना, मात तरीय आसतना तो तिका वेगवेगळ्या सापळ्यांनी घुस्पायत तिचीं पांखां कापपाचो यत्न करता. ह्या सगळ्या बोवाळांत बायलांनी आतां आपलो निश्चय अदीक घट्ट केला, असोच आभास जाता. म्हणूनच तर राजकारण जावं वा समाजकारण, खंयचेंच मळ तिका आता अस्पृश्य ना. कोण कितें म्हणटा तें म्हणू, ती मुखार सरत आसा. आनी तिच्या निर्णयांक बळगे दिवपी दादलेय ह्या समाजांत आपलीं मतां मांडटात, हें चड आश्वासक.
घरांतलें रांदप धरून भुरग्यांक सांबाळपाचें काम सहजतायेन करपी पत्रकार समर हळर्णकारा खातीर ह्यो गजाली केन्ना दादलो वा बायलेच्यो नाशिल्ल्योच. ताची बायल प्रिया रामाणी पुराय वेळ पत्रकार. घरा आयले उपरांत तिका रांदपाची गडबड कित्याक आसची? असो सादो प्रस्न समर करता. ताचे सारकेल्ले कितलेशेच ‘होम मेकर’ आयज खूब सहज घरांतली जबाबदारी स्विकारतात, कसल्याच कवतुकाची अपेक्षा दवरिनासतना! तांच्या घरातल्यो बायलो फुडारीच आसतल्यो वा खंयच्या तरी कंपनीच्यो सी.ई.ओ आसतल्यो अश्यांतलो भाग न्ही, मात आपल्या ल्हानश्या संवसारात लेगीत तांच्या घरा भायले क्षमतेक वाव मेळटा हेंच कितलें आश्वासक.
हरयाणांतल्या पानीपत जिल्ल्यांत सौदापुर नांवाचो एक गांव आसा. पुराय गांवांत सुमार 600 ‘हावस हजबंड’ आसात. हो गांव स्वताक गर्वान ‘घर जमाईं’ चो गांव म्हणून संबोधता. लग्न जावन घोव आपले बायलेगेर रावपाक येता. कितलीशींच वर्सां पयलीं सुरू जाल्ले हे प्रथेक थंयच्या लोकांचीं आपली कारणां आसात, मात आयज हे लग्न जावन आपले बायलेगेर रावपी घोव घरांतल्या कामांनी लेगीत तितलेच आदार करतात, हें महत्वाचें. आयकुपाक कितलेंय अडचणीचें दिसलें तरीय बायलेचें अस्तित्व आनी वर्सांन वर्सां चलत आयिल्ल्या प्रथांचो संबंद अशे बदल घडटले, तेन्ना समाज आपसूक सुदारतलो हेंय कितलें खरें? त्या सुदारणेंत येवपी सहजताय मागीर कायद्याचेर निंबून रावची ना. आदल्या पदांची नांवां बदलपाक आनी नवीन पदांक लिंगीक स्वरूप ना दिवपांत मागीर ती आपसूक भरसतली…
अन्वेषा सिंगबाळ
9923442746
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
