भांगरभूंय | प्रतिनिधी
लोकांक स्वास घेवपाक त्रास; 30 जाणांक सुरक्षीत सुवातेर हालयले
भांगरभूंय । प्रतिनिधी
पणजीः ताळगांवां शेतांत अचकीत उजो लागिल्ल्यान आणीबाणी सारकी परिस्थिती तयार जाली. उज्याक लागून धुवरांचे लोट उठले. शेजाऱ्याक आशिल्ल्या घरांनी धुंवर वचून लोकांक स्वास घेवपाक त्रास जालो. उजो पालोवपी दळान वेळ काडिनासतना 30 जाणांची धुंवरांतल्यान सुटका करून तांकां सुरक्षीत सुवातेचेर व्हेले. सुमार पांच वरां यत्न करून उजो नियंत्रणांत हाडलो. उज्याची खरसाण खूब आसली, पूण ह्या उज्याक लागून कोण जखमी जावंक ना.
ताळगांवां आदर्श कॉलनी कुशीक सकाळीं सुमार 11.30 वरांचेर सुक्या करडान अचकीत उज्याचो पेट घेतलो आनी ल्हवू ल्हवू उज्याची खरसाण वाडून उजो फुडें शेतांनी वचपाक लागलो. घडणुकेची म्हायती मेळटाच उजो पालोवपी दळाचे जवान सुवातेर पावले आनी उजो पालोवपाचें काम हातांत घेतलें. पूण वाऱ्याक लागून उजो खुबूच पातळ्ळो. ताळगांव मॉडल्स कॉलनी ते ताळगांव-करंजाळे सर्कल मेरेन चारूय वटांनी शेताक उज्यान रेवाडो घातलो.
ह्या शेता लागसर रावपी ताळगांवच्या थळाव्या लोकां खातीर भिरांकूळ परिस्थिती आसली. उज्या वांगडा धुंवराचे दाट लोट वयर सरताले. हो दाट धुंवर कुशीक आशिल्ले इमारतींत पावलो. ह्या धुंवराक लागून जाण्ट्यांक तशेंच भुरग्यांक स्वास घेवपाक त्रास जालो. उजो पालोवपी दळाच्या जवानांनी वगत काडिनासतना सुवातेर पावले आनी त्रास जाल्ल्या लोकांक सुरक्षीत थळार व्हरून तांकां मुळावो उपचार दिलो. पूण ह्या धुंवराक लागून कोण गंभीर दुयेंत पडूंक ना.
घडणुके विशीं म्हायती दितना थळावी सेसील रॉड्रिग्स हांणी सांगलें, ताळगांवां शेतांनी उजो लागपाची घडणूक वर्सुकी जाल्या. हे विशीं कितलो आवाज काडलो तरी हो विशय सुटपाचें नांव घेना.
ह्या उज्याक लागून शेता कुशीच्या इमारतींनी रावपी जाण्टे, भुरगीं आनी बाळकांक हाचो त्रास जालो. फुडाराक अश्यो घडणुको जावन कोणाचो जीव वच्चो न्हय म्हूण पंचायतीन हे विशीं उपाय येवजण करची. हो विशय सदांचोच जाला. आपणे कितेलेशेच खेपे हे विशीं ग्रामसभेंत आवाज काडला, पूण हो विशय सोडोवपाक पंचायत गंभीर ना, असो आरोप सेसील हांणी केलो. घडणुकेचो नियाळ घेवपा खातीर उजो पालोवपी दळाचे संचालक नितीन रायकार घडणुकेचे सुवातेर पावले. हे घडणुके विशीं उलयतना रायकार हांणी सांगलें, दनपारच्या सुमाराक आदर्श कॉलनी लागसार ताळगांवां सुक्या करडाक उजो लागला अशी आमकां म्हायती मेळ्ळी. आमी ताकतिकेन जवाना सयत मुख्यालयांतल्यान बंब धाडून उजो पालोवपाचें काम सुरू केलें. तेन्ना मदीं मदीं उजो पेटून धुंवराचे लोट सरताले. उजो आनी धुंवर दोनूय आमी सध्या नियंत्रणांत हाडल्यात. मुख्यालय, पणजी, पिळर्ण आनी पर्वरी स्टेशनांतल्यान बंब हाडिल्ले.
शेतकारांचें व्हड प्रमाणांत लुकसाण : रायकार
ताळगांवा खूबश्या थळाव्या लोकांनी गिमांत मळे लायल्यात. ह्या मळ्यांनी भाजयो, मिरसांगो लायतात. उज्याचेर नियंत्रण येवंक नाशिल्ल्यान तो मळ्यांनी पावलो. ह्या उज्यांत मळयांतले मिरसांगेचें पीक लासून करपलें. ह्या उज्याक लागून शेतकारांचें खुबूच लुकसाण जालां, अशें नितीन रायकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
