भांगरभूंय | प्रतिनिधी
पणजीः ताळगांवां मेकळे सुवातेर पार्क केल्ली मोटार घेवन पळून गेल्लो दुबावीत राज राजू सुहेदरे (32, रत्नागिरी) ह्या चोराक 24 वरां भितर मोटारी सयत पणजे पुलिसांनी अटक केली. साश्ट म्हालांतल्या नावेली वाठारांत रावपी लार्सन फर्नांडीस हांणी शुक्रारा हे संबंदांत कागाळ दाखल केल्ली.
जीए 08 एन 2386 ह्या नंबराची पाचव्या रंगाची ‘डॅटसन रेडी गो’ ही मोटार 11 जानेवारीक रातच्या सुमार 10.15 वरांचेर ताळगांवच्या कम्युनिटी हॉल लागसार उक्त्या जाग्यार पार्क केल्ली. 12 जानेवारीक दनपारां 1 वरांचेर थंय आयलो तेन्ना मोटार नाशिल्ली. हे मोटारीचें मोल 2 लाख रुपया इतलें आसा, अशें मोटारीचो धनी फर्नांडीस हांणी पणजे पुलिशेंत केल्ले कागाळींत नमूद केला.
सांजेच्या सुमार 6.10 वरांचेर कागाळ दाखल जाले उपरांत पुलिसांनी चोरयेचो गुन्यांव नोंद करून रोखडोच तपास सुरू केलो. सीसीटीव्ही फुटेजांतींल्यान गाडी वचपाची दिका मेळ्ळी आनी 24 वरां भितर दुबाविताक गाडये सयत अटक केली. दुबावीत राज महाराष्ट्रांतल्या रत्नागिरीच्या जाधववाडीचो रावता, पूण सध्या तो सिंधुदुर्ग जिल्ह्यांतल्या तळेगांवांत रावता. पणजेचे पुलीस निरिक्षक निखील पालेकार हांच्या फुडारपणाखाला हेडकॉन्स्टेबल विनीत कुर्टीकार, नितीन गांवकार, सायेश उस्कयकार आनी आदित्य म्हर्दोळकार हांच्या पंगडाक 24 वरां भितर दुबाविताक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
