भांगरभूंय | प्रतिनिधी
आतां ‘एएसआय’ सयत ताचे वयल्या अधिकाऱ्यांकूय अधिकार
पणजी : येरादारी नेमांक पाळो दिनासपी वाहनचालकांक तालांव दिवपाच्या अधिकारा विशींच्या निर्णयाचेर पुलीस खात्यान फक्त 14 दिसांत ‘यू-टर्न’ घेतला. 14 दिसां पयलीं आदेश जारी करून तालांव दिवपाचे अधिकार फक्त येरादारी पुलीस विभागाचे उपअधिक्षक वा पुलीस निरिक्षकांक दिल्ले. हे विशीं बुधवारा जारी केल्ल्या आदेशांत हाचे मुखार येरादारी नेमांक पाळो दिनासप्यांक तालांव दिवपाचे अधिकार एएसआय वा ताचे वयल्या पुलीस अधिकाऱ्यांकूच आसतले. त्या पदा सकयल्या पुलीस कर्मचाऱ्यांनी खंयचेच स्थितींत वाहनां तपासणे खातीर आडावची न्हय, अशें आदेशांत नमूद केलां.
मजगतीं, पुलिसां कडल्यान थळावे नागरीक तशेंच पर्यटकांक कारण नासतना आडावन तांची कागदपत्रां तपासताले. ताका लागून नेमांक पाळो दिवन वाहन चलोवप्यांक ताचो त्रास जातालो. विधानसभा अधिवेशनांत विरोधकांनी हो प्रस्न सभाघरांत मांडले उपरांत 14 जुलयाक पुलीस म्हानिरिक्षक ओमवीर सिंग बिश्नोई हांणी आदेश जारी करून एखाद्या वाहन चालकां कडल्यान येरादारी नेमांचे उल्लंघन जाल्ल्याचे स्पश्ट दिसल्यार वाहन आडावचे. कारण नासतना लोकांक त्रास दिवचो न्हय अशी सुचोवणी येरादारी पुलिसांक केल्ली.
येरादारी पुलीस विभागाचे उपअधिक्षक वा पुलीस निरिक्षक हांणीच तालांव दिवचो. तशेंच वाहनाचीं कागदपत्रां तपासपाचें अधिकार फक्त उपअधिक्षक आनी निरिक्षक हांकांच आसात. हेर पुलिसांनी कागदपत्रां तपासचीं न्हय. संबंदींत विभागांच्या अधिक्षकांनी हे आदेश पाळचे, अशी सुचोवणी त्या वेळार दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
