भांगरभूंय | प्रतिनिधी
आदल्या तेंपा सावन गुलाबाक फुलांचो राजा म्हूण भोवमान मेळिल्लो आसा. कसलोय दबाजो जावं, मागीर तें उक्तावण, वाडदीस, लग्न सुवाळो, जात्रा सगले कडेन नदरेक गुलाब दिसतात.
फेबुवारी हो मोगाचो. मोगाचो शिंवर करपाचो म्हयनो. मोग करणाऱ्यांचो हो खास म्हयनो. 14 फेब्रुवारी हो दीस व्हॅलेंटायन दीस म्हण भारतांत मोठे उमेदीन लाखांनी लोक मनयतात. त्या वेळार मोगी जोडपीं एकमेकांक तांबडे टवटवीत गुलाब भेटयतात.
गुलाब हें मोगाचें शुभ प्रतिक मानतात. एक सप्तका पयलीं रोझ डे, प्रपोज डे, चॉकलेट डे, टेडी डे, हग डे, कीस डे अशे तरेकवार दीस वेगवेगळ्या रंगांचें गुलाब दिवन मनयतात. 14 फेब्रुवारीक फक्त तांबड्या रंगाचे गुलाब मोगी मोगिकेक दिता वा ती ताका दिता. तशें पळोवंक गेल्यार गुलाबाच्या फुला सारकें सोबीत फूल ह्या सैमांत दुसरें कसलेंच ना. सैमान ह्या फुलाक व्हडा फुरसतीन तयार केलां. सैमान शेंकड्यांनी रंगिबेरंगी फुलां फुलतात. पूण गुलाबाचें फुल मोहक, नाजूक, ल्हान, व्हड पाकळ्यांनी भरिल्लें आसता. दुसऱ्या फुलांनी असल्यो कुचकुचीत पाकळ्यो ना. ताका वासूय बरो येता. मन प्रसन्न जाता. गुलाब हे नाजूक. तांकां चुकून पसून हात लागलो जाल्यार पाकळ्यो गळून पडटात. ताका कोणे सोंपपणी हात लावचो न्हय म्हूण सैमान तांचे सरभोंवतणी कांट्यांचें संरक्षण कवच तयार केला. म्हणटात न्हय, ‘कांट्या बगर गुलाब ना’. आदल्या तेंपा सावन गुलाबाक फुलांचो राजा म्हूण भोवमान मेळिल्लो आसा. कसलोय दबाजो जावं, मागीर तें उक्तावण, वाडदीस, लग्न सुवाळो, जात्रा सगले कडेन नदरेक गुलाब दिसतात.
भारताचे पयले प्रधानमंत्री पं. जवाहरलाल नेहरू सदांच आपल्या कोटाक गुलाबाचें फूल लायताले. शिर्डीच्या साईबाबाक गुलाबाचे व्हडले- व्हडले हार ओंपतात. सगले सण, खोशेचे दीस हे गुलाबा विणें अर्दकुटे. मान, सन्मान, मोग हाचें प्रतीक म्हणल्यार गुलाब. व्हॅलेंटायन दीस म्हणजे तांबडो गुलाब दिवन आपलो मोग व्यक्त करप दुसऱ्याच तुमचेर आशिल्लो मोग ताका कळोवपाचें काम गुलाब करता. गुलाब आपल्या परमळान मन धादोशी करता. एकमेकांचेर जीव जडटा. आयुर्वेदांतूय गुलाबाचे वखदा खातीर उपेग सांगल्यात. गुलाब पाणी, सरबत, सुगंधी साबू, अत्तर. गुलाबाचो पाकूय करतात.
तर असो हो गुलाब, मोहक, सुंदर, मनभुलोवणो. दोन जिवांचें मिलन, तांचें रुपांतर मोगांत करपी गुलाब- मोगाचें प्रतीक, फुलांचो राजा. मोगी, मोगिकेचो मायेमोगाचो सोबती. सगल्यांत व्हॅलेटायन दीस खोशेचो वचूं.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
