भांगरभूंय | प्रतिनिधी
तांबडे मातयेचो राजा म्हणून वळखतात असो व्हड टेनिस खेळगडो राफेल नदाल हो हालींच जाल्ले फ्रेंच ओपन टेनिस सर्तींत जैतिवंत जालो. हांवूच तांबडे मातयेचो राजा अशें ताणें सिद्ध केले. खेळगडे निवृत्त जातात त्या काळांत पिरायेच्या 36 व्या वर्सां नदालान आपले परस पिरायेन ल्हान आशिल्ल्या कॅस्पर रुढाक हारोवन हो किताब जिखला. निमाणे फेरयेत नदालान रुढाक फकत 2 वरां 18 मिनटांनी 6- 3, 6- 3, 6- 0 असो हारयलो. फकत हें तांचे 14 वे फ्रेंच ओपन किताब न्हय तर ताणें आपल्या कारकिर्दीत सगळ्यांत चड 22 ग्रँड स्लॅम जिखून संवसारिक विक्रम केला. ताचे सर्तक रॅाजर फेडरर आनी नोव्हाक जोकोव्हीच हांणी 20 ग्रँड स्लॅम जिखल्यांत.
फ्रेंच ओपन जिखपी राफेल नदाल हो सगळ्यांत जाणटो टेनीस खेळगडो थारलो. विशेश म्हल्यार तो हे सर्तीत पुराय फिट नाशिल्लो. तरीय ताणें फकत आपले जिद्दीच्या बळाचेर हो ग्रँड स्लॅम जिखलो. फ्रेंच ओपन टेनिस कोर्टा वयली तांबडी माती जशी दसपी, घट आनी कठीण आसता तसोच नदाल हो एकदा कोर्टाचेर देंवलो की फाटीं वळून पळयना. तो कोर्टाचेर देंवता तो फकत जिखपा खातीर. राफेल नादाल हाचो जल्म 3 जून 1986 दिसा जालो. स्पेनांतल्या एका जुव्यां वयल्या मध्यमवर्गीय कुटुंबांत तो जल्मलो. ताचो बापूय खाणावळ चलयता. ताचो काका फुटबॅाल खेळगडो आशिल्लो. तांणे राफेलचो खाशेलो गुण पळोवन ताच्या हातांत रॅकेट दिलें. ल्हान पिरायेचेर ताणें टेनिसांत फिशालकाय मेळयली. पिरायेच्या 8 व्या वर्सां ताणें 12 सर्ती जिखल्यो. पिरायेच्या 8 व्या वर्सां सुरु जाल्लें राफेलाचें हें जैत पिरायेच्या 36 व्या वर्सां आयज मेरेन चालू आसा. ताणें कारकिर्दीत 92 सर्ती जिखल्यो. चारय ग्रँड स्लॅम सर्ती फ्रेंच, विम्बल्डन, अमेरिकन आनी ऑस्ट्रेलियन जिखल्यात आनी तातून फ्रेंच ओपन सर्त 14 फावटीं जिकून इतिहास घडयलो. फ्रेंच ओपन सर्त ही मातयेचेर खेळतात म्हणून चारय ग्रँड स्लॅमांतली ही कठीण सर्त अशें मानतात. विम्बल्डन सर्त ग्रासकोर्टाचेर म्हणल्यार हिरवळीचेर, जाल्यार ऑस्ट्रेलियन आनी अमेरिकन सर्त सिंथेटिक कोर्टाचेर म्हणल्यार काँक्रिटा सारक्या मैदानाचेर खेळटात. विम्बल्डनाचे हिरवळीचेर बाॅल गतीन उडटा जाल्यार हार्ड कोर्टाचेर मध्यम उडटा. त्या खातीर बाॅल रॅकेटाचेर येता. पूण मातयेच्या कोर्टाचेर सवकास उडटा, म्हणून स्पर्धक धावून वचून बाॅला मेरेन पावपाची चड शक्यताय आसता. खेळगड्यांक शॅाट मारपा खातीर चड नेट लावचो पडटा. अश्या वेळार शारिरीक तांकीचो कस लागता. देखून रॉजर फेडरर सारको व्हड खेळगडो लेगीत ही सर्त फकत दोन फावटीं जिखला. आर्थर एश, बोरिस बेकर, पिट सॅम्पर्स, स्टीफन एडबर्ग, जॉन मॅकन्रो हांचे सारके व्हड खेळगडे केन्नाच फ्रेंच ओपन सर्त जिखपाक शकले नात. पूण संवसारभरातली सगळ्यांत कठीण मानतात ती फ्रेंच ओपन सर्त 14 फावटीं जिखून इतिहास घडोवपी राफेल नदाल हो तांबड्या मातयेचो राजा थारला.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
