भांगरभूंय | प्रतिनिधी
मुख्यमंत्रीः राष्ट्रीय युवा दिसा तरणट्यांक उलो तशेंच स्वयंपूर्णतेची घोशणा
भांगरभूंय । प्रतिनिधी
दिवचलः आत्मनिर्भर स्वयंपूर्ण भारत आनी संवसारीक महासत्ते वटेन वाटचाल करपी आधुनीक भारत तशेंच स्वयंपूर्ण आनी आत्मनिर्भर गोंयचें आमी पळयिल्लें सपन प्रत्यक्षांत येवचें, हे खातीर युवा चल्या- चलयांचें विशेश योगदान म्हत्वाचें थारतलें. स्वामी विवेकानंद हांच्या विचारांची प्रेरणा आनी प्रधानमंत्री नरेंद्र मोदी हांच्या सपनांतलो विकसीत भारत निर्माण करचे खातीर विवीध कुशळटाय विकसीत करून तरणाट्यांनी साबार मळार आपलें योगदान दिवचे खातीर फुडाकार घेवचो, असो उलो मुख्यमंत्री डॉ. प्रमोद सावंत हांणी मारलो.
बिरेस्तारा राष्ट्रीय युवा दिसा निमतान मुख्यमंत्र्यान हो उलो मारलो. गोंयांतल्या तरणाट्यां खातीर साबार येवजण्यो केंद्र आनी राज्य सरकारान चालीक लायल्यात. ताचो फायदो घेतना हेरांक लेगीत उर्बा दिवन स्वयंपूर्ण मिशन सार्थ थारावपा खातीर युवा शक्तीन एकठांय येवचें, अशें मुख्यमंत्र्यान प्रसार माध्यमां कडेन उलयतना सांगलें.
विकसीत गोंयचे आनी देशाचें सपन पळोवन ताका मूर्त स्वरूप मेळोवचे खातीर स्वयंपूर्ण गोंय, स्किलींग, रि स्किलींग, उपस्किलींगच्या माध्यमांतल्यान मेळपी पोर्टलाचेर वचून तरणाट्यांनी खूबश्या विशयांतली कुशळटाय विकसीत करचे खातीर विशेश वावर करचो, अशें मुख्यमंत्र्यान गोंयच्या तरणाट्यांक सांगलें. गोंयांतले युवा पिळगेंत नवनिर्मितीचे, नाविन्याचें, अफाट बुद्दीमत्ता लाबिल्ले आनी कसल्याय आव्हानांक फुडो करपाची तांक आशिल्ली शक्त आसा. मात ताका योग्य दिशा दिवपाची आनी योग्य मार्गदर्शनाची गरज आसा. केंद्र आनी राज्य सरकार ते खातीर बांदील आसा, अशें मुख्यमंत्री डॉ. सावंत हांणी सांगलें. तशेंच युवा दिसा निमतान गोंयांतल्या तरणाट्यांक तशेंच लोकांक शुभेत्सा दिल्यो.
सरकारी नोकरेचो हट्ट सोडात
सरकारी नोकरीच जाय हो हट्ट आतां सोडात. सगळ्या मळांचेर कुशळटाय विकसीत करून स्वावलंबी जावन हेरांक लेगीत रोजगाराची संद उपलब्ध करून दिवपाचें सपन पळोवन तें साकार करचे खातीर वावर करात. राज्य सरकारान खूबशे तरेन युवा शक्तीक चालना दिवपाचो ध्यास धरला. हरीत क्रांती, धवल क्रांती, उद्देग क्रांती, हांचे सयत साबार मळांचेर सरकारान बऱ्यो येवजण्यो हाडून उर्बा दिल्या. ताका लागून आळस कुशीक दवरून आपली जापसालदारकी, आपली कुळशटाय सिद्ध करचे खातीर तरणाट्यांनो मुखार सरात, सरकार तुमकां सगळे तरेचो आदार करचे खातीर तयार आसा, अशी हमी मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
