भांगरभूंय | प्रतिनिधी
पणजी: आपल्यो भावना व्यक्त केल्यो नात जाल्यार त्यो मनांतूच उरतात. हे घुस्मटींतल्यान मागीर गरजे भायलीं पावलां उबारप जाता. हें टाळपा खातीर तरणाट्यांनी तांच्या मनांतली भावना व्यक्त करप गरजेचें आशिल्ल्याचें मत मुख्यमंत्री डॉ. प्रमोद सावंत हांणी उक्तायलें. वॉव फावंडेशन, सांख्यिकी आनी नियोजन आनी उच्च शिक्षण संचालनालया वतीन आयोजीत स्पर्श आंतरमनाचो हे कार्यावळींत ते उलयताले. ह्या वेळार केतकी परब, भूषण सावयकार, विजय सक्सेना हाजीर आशिल्ले.
मुख्यमंत्र्यानी म्हणलें, विद्यार्थ्यांची मानसीक भलायकी बरी उरची हे खातीर आमी म्हाविद्यालय तशेंच उच्च शिक्षण संस्थेंत कावन्सिलींग हो विशय सुरू केला. हे खातीर कावन्सीलर लेगीत नेमल्यात. पूण ह्या कावन्सिलरा मुखार विद्यार्थी चड उलयनात अशें समजलां. भावनांक वाट करून दिवंक जाय. नाजाल्यार ताचो त्रास स्वताकूच जाता. शारिरीक तंदुरुस्ती सयत मानसीक नदरेन तंदुरुस्त आसप तितलेंच म्हत्वाचें आसा.
मुख्यमंत्र्यांनी मुखार म्हणलें, पयलीं रासवळ कुटूंब पद्दत आशिल्ली. तातूंत आवय तिडकली जाल्यार काकी लागी करताली वा आजी समजावन सांगताली. आतां विभक्त कुटूंब पद्दत आसा. फक्त शारांतल्या फ्लॅटांनीच न्हय जाल्यार गांवांतल्या घरांनी लेगीत विभक्त कुटुंबां आसात. आतां एखाद्या भुरग्याची आवय तिडकली जाल्यार ताचे कडेन भावना व्यक्त करपा खातीर दुसरो मनीस नासता. अशा वेळार मन मेकळे करपा खातीर कावन्सिलींग वा समुपदेशन म्हत्वाचें थारता.
माय भारत पोर्टल वापरात
प्रधानमंत्री नरेंद्र मोदी हांणी तरणाट्यांक बराबर जोडपा खातीर माय भारत पोर्टल सुरू केलां. तुमकां दिसता आसत की तुमी कोणाच कडेन उलोवंक शकनात. अशा वेळार ह्या पोर्टला वरवीं तुमी स्वताक व्यक्त करूंक शकतात. ह्या पोर्टलांतल्यान करियर विशयक सल्लो लेगीत मेळटलो अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
