भांगरभूंय | प्रतिनिधी
वाळपय : अनवळख्या तरणाट्यांच्या टोळक्यान होंडा पॅत्रॉल पंपाचेर काम करपी एका कर्मचाऱ्याक मारपाचो यत्न केल्ल्यान आयतारा सुमार 4 वरांचेर होंडा तणाव निर्माण जालो. तरणाटे पुलीस स्टेशनाचेर व्हड प्रमाणांत जमले आनी तांणी रातीं उसरां मेरेन थंय ठाण मांडून त्या तरणाट्यांक धरपाची मागणी केली. रातीं उसरां मेरेन थळावे पुलीस त्या तरणाट्यांक सोदताले.
मेळिल्ले म्हायती प्रमाण, होंडा पॅत्रॉल पंपाचेर काम करपी महादेव गांवकार हांचे कडेन तरणाट्यांचो वाद जालो. ते गाडयेच्या रोदाक वारो मारपाक आयिल्ले, पूण कळाव जाल्ल्यान तांकां तिडक आयली. मागीर वाद जातकूच तांणी महादेव गांवकाराक मारपेट केली. हेर कर्मचाऱ्यांनी तांकां आडावपाचो यत्न केलो. सगले कर्मचारी आक्रमक जाल्ल्यान तरणाटे पळून गेले. ते म्हापशें वाठारांतले अशें तांच्या गाडयेच्या क्रमांकां वयल्यान स्पश्ट जाता. मात तांचो पत्तो मेळूंक ना.
झगडीं पळोवन थळावे लोक थंय धांवले आनी कर्मचाऱ्यांची बाजू घेतली. हे तरणाटे वट्ट चार गाडयांनी आयिल्ले अशें कर्मचाऱ्यांनी सांगलें. ते सोऱ्याचे घुंवळेंत आशिल्ले. थळाव्या लोकांक लागून पॅत्रॉल पंपाच्या कर्मचाऱ्यांचो जीव वाटावलो. तांचे कडेन सुरी आशिल्ली, अशें पंपा वयल्या कर्मचाऱ्यांनी सांगलें.
होंडा वाठारांतले गांवकार आनी कर्मचारी धांवून पुलीस स्टेशनांत गेले आनी तांणी थंय धरणें धरलें. रातीं उसरां मेरेन पुलीस त्या तरणाट्यांक सोदताले. पुलीस निरिक्षक प्रज्योत फडटे आनी हेर अधिकारी चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
