भांगरभूंय | प्रतिनिधी
संवसारांत जर खंयचो देश तरणाटो आसा, जाल्यार तो आमचो भारत देश. आयज आमच्या देशाची लोकसंख्या 136 कोटी आसा. देशांतल्या वट्ट लोकसंख्येंतले 65 टक्के लोक हे 18 ते 40 वर्सां पिराय गटांत आसात. तांचे कडेन खूब उर्जा आसा. देशाचो फुडार ह्या तरणाट्यांचेर आदारून आसा. तांच्या बळग्याचेर आमी एक महाशक्त जावपाचें सपन पळयतात.
आदले राष्ट्रपती ए. पी. जे. अब्दुल कलाम हांचो लेगीत तरणाट्यांचेर खूब विस्वास आशिल्लो. तरणाटे हे आमच्या देशाचे भाग्यविधाते आसात, अशें ते म्हणटाले. ह्या तरणाट्यां कडेन आशिल्ली उर्जा देशाच्या वावराक वापरची, अशें ताचें मत आशिल्लें. पूण आयज तरणाट्यां मुखार जायतीं आव्हानां आसात. पूण तांचे कडेन दोन हात करपाक तातूंतले कांय तरणाटे फाटीं रावंक ना.
सगळ्यांत व्हडलें आव्हान तरणाट्यां मुखार आसा तें म्हणल्यार बेकारी. आयचे तरणाटे उच्च शिक्षण घेतिल्ले आसात. हुशार आसात. गिन्यान, विज्ञान, तंत्रगिन्यान, कला, खेळ, साहित्य ह्या सारक्या सगळ्या मळांचेर मुखार आसात. देशा खातीर कितें तरी करपाची तांकां जिद्दआसा. शिक्षण आनी कामाची उमेद आसून लेगीत तांकां नोकरी ना. तरणाटे पदवी घेवन भोंवतात, पूण नोकरी ना. ज्या लोकांक नोकरी आसा ती तिगोवप कठीण जालां. स्वताचो वेवसाय सुरू करपाचो आसल्यार भांडवल ना. शेतांत देंवल्यार पयशे मेळटलेच, हाची खात्री ना. देखून आयचे तरणाटे निर्शेल्यात. तांकां उर्बा दिवन नोकरी दिवचे बदला कांय राजकी फुडारी तांकां ‘भजीं तळात आनी विकात’ अशें सांगतात आनी तांच्या घांव्यांचेर मीठ चोळटात. कांय जाण तांच्या मनांत दुसऱ्यां विशीं दुस्वास भरतात.
रोजगाराच्या उणावाक लागून आयिल्ले उदासीनतायेक लागून कांय तरणाट्यांनी आत्महत्या केल्यात, तर कांय तरणाटे वेसनांत घुस्पल्यात. ज्या तरणाट्याच्या बळग्यार आमी महाशक्त जावपाचें सपन पळयतात ते आपलें जिवीत वेळा पयलींच सोंपोवपाक लागल्यात, हें पळोवन दुख्ख जाता.
रोजगार नाशिल्ल्यान तरणाट्यांच्या मनांत वेवस्थे आड सुप्त असंतोश दिसता. तो पेटचे पयलीं सरकारान तरणाट्यांक रोजगार दिवपा खातीर ठोस धोरण आंखपाक जाय. तरणाट्यांची तकली सटकली जाल्यार बऱ्याच जाणांक लिपून भोंवचें पडटलें. सध्याचें बेकारीचें प्रमाण फाटल्या 45 वर्सांत सगळ्यांत चड आसा, ही गजाल म्हणल्यार भूशण न्हय. हो दर उणो करून तरणाट्यांक रोजगार दिवपाक सरकार कसलेच एकवटीत यत्न करीना, अशें दिसता. ह्या तरणाट्याचो वापर फकत मतां मेळोवपाक जाता. तरणाट्यांच्या हाताक काम मेळप ही काळाची गरज. नाजाल्यार ते वाट चुकपाची शक्यताय चड. समाजाक, देशाक तांच्या शिक्षणाक फायदो जावचे बदला तांची उर्जा फुकट वचपाची चड शक्यताय आसा. ती राश्ट्रीय वावराक वापरपाक जाय. देशाच्या कामा खातीर तरणाट्यांचो उपेग केल्यार आमकां महाशक्त जावपा पसून कोणूच आडावंक शकना.
आयची तरणाटी पिळगी ही आमची तांक. ही शक्त वापरची. संवसारांत तरणाट्यांचो आंकडो भारतांत सगळ्यांत चड आसा. चीना उपरांत संवसारांत आमच्या भारतांत सगळ्यांत चड लोकसंख्या आसा. खरें म्हणल्यार ही एक समस्या न्हय तर एक संद म्हणून पळोवपाक जाय. तिचो फायदो घेवन तरणाट्यांक रोजगार दिलो जाल्यार भारत महाशक्त जातली हातूंत दुबाव ना.
आयच्या तरणाट्यांक संवसार सोबीत आनी शांत आसचो अशें दिसता. तांकां गरिबी, भ्रश्टाचार नाका. प्रजासत्ताक राष्ट्राचेर तांची निश्ठा आसा. आमी मुखार उबो आशिल्ल्या मनशाक समजून घेनासतना तांचो दुस्वास कसो करपाक शकतात? ह्या प्रस्नाची जाप सोदपाचो ते तरणाटे सतत यत्न करतात. तांकां थीर आनी सुरक्षीत अर्थवेवस्था जाय. तांकां आपल्या भोंवतणच्या वाठाराची तितलीच जाणविकाय आसा. संसाधनां सोंपतलीं देखून तीं उण्या प्रमाणांत वापरप ते पसंत करतात. थोड्याच उतरांनी सांगचें जाल्यार आयचे तरणाटे जापसालदार आसात. ते आपलें शिक्षण गंभीरतायेन घेतात. पयशां परस सुख चड म्हत्वाचें आशिल्ल्यान तांकां आपले आवडी प्रमाण करिअर वेंचप चड मानवता, देखून ते कितें करतात ताका लोकांनी मान दिवचो, अशें तांकां दिसता.
एका अभ्यासा प्रमाण, 69 टक्के तरणाटे पयशांनी तांकां सुख विकतें घेवंक मेळना हें खरपणान मानतात, जाल्यार 80 टक्के तरणाटे पयशा परस कला चड म्हत्वाची, 79 टक्के तरणाटे पयशां परस शिक्षण चड म्हत्वाचें आनी 76 टक्के तरणाटे पयशा परस येश चड म्हत्वाचे अशें मानतात.
आयच्या राष्ट्रीय युवा दिसा निमतान सगल्यांक परबीं.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
