तमनार प्रकल्पाचेर गोंयची अर्थवेवस्था आदारून आसा ः वीज अभियंते फर्नांडीस

भांगरभूंय | प्रतिनिधी

मिरामारा जालो वीज उर्जा सांठवण आनी वेवस्थापनाचेर परिसंवाद

पणजी, प्रतिनिधी ः तमनार पॉवर लायन प्रकल्प ही गोंयची गरज. राज्याची पुराय अर्थवेवस्था तमनाराचेर आदारून आसा. मुखेल वीज अभियंते स्टीफन फर्नांडीस हांचें मत.
मिरामारा कार्यक्षम विद्युत उर्जा सांठवण आनी वेवस्थापन ह्या विशयाचेर जाल्ल्या परिसंवादांत श्री. फर्नांडीस उलयताले.
चर्चासत्रांत पर्यावरण मंत्री निलेश काब्राल, जीसीसीआय अध्यक्ष श्रीनिवास धेंपो, जीईडीए वांगडी सचीव संजीव जोगळेकार, ओएनजीसीचे महाव्यवस्थापक अरुण कुमार, न्यू एनर्जी सोल्युशन्साचे मुखेल कार्यकारी अधिकारी नितिन शर्मा, जीआयझी इंडिया पंगड फुडारी बर्नहार्ड वोएलकर, उर्जा सल्लागार जितेश कुमार आनी व्ही. फोर्ट पार्टनर प्रायव्हेट लिमिटेड आयपीपी निकिता पवार हांचो आस्पाव आशिल्लो.
खंयचीच ग्रिड एकाच स्त्रोताचेर चलूंक शकना, प्रलंबीत प्रकल्पांक विरोध जायत आसा. ताका लागून हे प्रकल्प जर चालीक लागले नात जाल्यार गोंय खातीर वीज समस्या अनिवार्य आसात. तीं कोणूच पयस करपाक शकचोना. जायते फावट वीज खात्याक इत्सा आसून लेगीत झटपट दुरुस्ती करपाक मेळना. तरीय आमचे कामगार रातदीस वावुरतात, अशें तांणी सांगलें.
आदले वीज मंत्री, भौशीक बांदकाम आनी पर्यावरण मंत्री निलेश काब्राल हांणी सांगलें, तमनार प्रकल्प ‘खूब म्हत्वाचो’ आनी ‘सगल्यांनी ह्या प्रकल्पाक आदार दिवचो’. गोंय हें पर्यटन राज्य. साबार मळांचेर उदरगत करपाची आसा, तर हो प्रकल्प सामको गरजेचो. गोंयचे अर्थवेवस्थेक तो योगदान दितलो.
2030 मेरेन गोंय हरित करपा खातीर केंद्र सरकारान थारायिल्ल्या रस्तो नकाशाची म्हायती गोंय उर्जा विकास एजन्सीचे वांगडी सचीव संजीव जोगळेकार हांणी दिली.
गोवा चेंबर ऑफ कॉमर्सचे अध्यक्ष, उद्देगपती श्रीनिवास धेंपे हांणी उत्पादकां खातीर कार्बन फुटप्रिंट उणो करपाचें म्हत्व उक्तायलें. आमचे फुडले पिळगे खातीर आनी पर्यावरणा खातीर हें करपाक जाय अशें तांणी सांगलें. भारतान पयलींच 2070 मेरेन निव्वळ शून्य उत्सर्जन करपाचें थारायलां. 2030 उपरांत जायतीं कॉर्पोरेटां तें साध्य करपाक वावुरतात अशें तांणी सांगलें.
गोंयची अर्थवेवस्था तिगोवन दवरपाक आनी घटमूट करपाक तमनार वीज लायनीची म्हत्वाची भुमिका आसा. अक्षय उर्जेचें म्हत्व वाडत आशिल्ल्यान परिसंवादांत टिकावू फुडारा खातीर निवळ उर्जा स्त्रोतां कडेन वचपाची गरज आसा हाचेर भर दिलो. सौर उर्जा, वाऱ्या पसून तयार जावपी उर्जा हाचेंय म्हत्व उलोवप्यांनी ह्या परिसंवादांत सांगलें.