भांगरभूंय | प्रतिनिधी
सुदिन ढवळीकारः 2030 मेरेन दीसपट्टी लागतली 1,100 मॅगावॅट वीज
भांगरभूंय । प्रतिनिधी
पणजीः दरवर्सा गोंयांत वीज गिरायक व्हड प्रमाणांत वाडटात. 2030 मेरेन दर दिसा गोंयाक सुमार 1,100 मॅगावॅट विजेची गरज लागतली. अशे परिस्थितींत तमनार वीज प्रकल्प गोंया खातीर म्हत्वाचो थारतलो, अशें वीज मंत्री सुदिन ढवळीकार हांणी आयतारा ‘भांगरभूंय’ कडेन स्पश्ट केलें.
सध्या गोंयाक दर दिसा सुमार 650 मॅगावॅट वीज लागता. पर्यटन मोसमांतल्या तीन ते चार म्हयन्यांत दीसपट्टी सुमार 750 मॅगावॅट परस अदीक विजेची गरज लागता. सध्या गोंय सरकारान वीज खरेदी खातीर हेर राज्यां कडेन कबलात केल्या. तशेंच सौरउर्जेंत वाड करपाचेय यत्न चालू आसात. पूण 2030 मेरेन गोंयाक दर दिसा आनीक 450 मॅगावॅट विजेची गरज लागतली. तमनार प्रकल्पांतल्यान दोन वर्सां उपरांत सद्दां 1,200 मॅगावॅट वीज मेळटली. तातूंतली गरज लागता तितली वीज गोंय सरकाराक घेवपाक मेळटली. ताका लागून फुडारांतलें गोंयांतलें विजेचें संकश्ट पुराय तरेन पयस जातलें, अशें मंत्री ढवळीकार हांणी सांगलें.
नोकरी, वेवसाया निमतान गोंयांत राबितो करपी बिगर गोंयकार तशेंच वाडटें उद्देगिकीकरण हाका लागून गोंयांतल्या वीज गिरायकां मदीं दर वर्सा व्हड प्रमाणांत वाड जाता. हे खातीर सरकाराक लेगीत केंद्र सरकार तशेंच हेर राज्यां कडल्यान चडांत चड वीज खरेदी करची पडटा. गोंयांत चडांत चड रोजगार उपलब्ध करून दिवचे खातीर तशेंच महसूल मेळोवचे खातीर गोंय सरकारान फुडल्या काळांत उद्देगिकीकरणाचेर चड भर दिवपाचो निश्चेव केला. ते खातीर वेगवेगळ्यो येवजण्यो लेगीत चालीक लायल्यात. ते खातीर फुडल्या कांय वर्सांत गतीन उद्देगिकीकरण जावन गोंयाक आनीक विजेती गरज लागतली. पूण तमनार प्रकल्पाचें काम गतीन सुरू आशिल्ल्यान फुडल्या दोन वर्सां उपरांत ह्या प्रकल्पांतल्यान सद्दां 1,200 मॅगावॅट वीज उपलब्ध जातली आनी गोंयाक फावोशी वीज वापरपाक मेळटली. ताका लागून गोंयकारांक व्हड थाकाय मेळटली, अशें मंत्री ढवळीकार हांणी सांगलें.
‘ओटीएस’चो लाव घेवंक नाशिल्ल्यांचें कनेक्शन काडटले
खूब वर्सां सावन थकीत आशिल्लीं वीज बिलां लोकांक भरपाक मेळचीं, हे खातीर खात्यान वन टायम सेटलमेंट (ओटीएस) येवजण सुरू लोकांक तशेंच कंपनी, आस्थापनांक थाकाय दिल्या. थकीत बिलांत येवजणे प्रमाण तांकां सवलत लेगीत मेळपाची, पूण खूब जाणांनी येवजणेचो लाव घेवन बिलां भरूंक नात. अश्या लोकांचें वीज कनेक्शन काडपाची प्रक्रिया खात्या वतीन चालू आसा, आनी हेर मुखार लेगीत चालू उरतली, अशेंय मंत्री सुदिन ढवळीकार हांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
