भांगरभूंय | प्रतिनिधी
भांगरभूंय खबरांमेज
पणजी ः फाल्यां, मंगळारा, 21 जून 2022 दिसा आठवो आंतरराष्ट्रीय योग दीस संवसारभर व्हडा दबाज्यान मनयतात.
संवसारमान्य जाल्लें हें योगशास्त्र आमकां रुशीमुनींनी दिलां. राष्ट्रसंत पूज्य सद्गुरू ब्रह्मेशानंदाचार्य स्वामींनी योगशास्त्राचो प्रचार आनी प्रसार 1989 वर्सा गोंयांत आरंभ केलो आनी आयज आंतरराष्ट्रीय अध्यात्मीक धर्मगुरू, श्री दत्त पद्मनाभ पीठ विद्यमान पीठाधिश्वर पद्मश्री धर्मभूषण पूज्य सद्गुरू ब्रह्मेशानंदाचार्य स्वामीजींच्या पावन मार्गदर्शनान हें कार्य अखंड चलत आयलां. तपोभूमी गुरूपीठाच्या माध्यमांतल्यान गोंयांत गांवांगांवांनी योगाचार्य तयार जाल्यात आनी ते योगशास्त्राचो प्रचार गोंयांतूच न्हय, संवसारभर करत आसात.
पूज्य स्वामीजींच्या दिव्य आशिर्वादान श्री दत्त पद्मनाभ पीठ आनी सद्गुरू योग गुरूकुलाचे वतीन आंतरराष्ट्रीय योग दीस फाल्यां, 21 जून दिसा सकाळीं 7 वरांचेर श्री क्षेत्र तपोभूमी गुरूपीठाचेर मानेस्त आनी गुरूपीठाचे शिश्य, गुरुकुलांतले बटू, उपाध्याय आनी सगल्या योग साधकांचे हाजिरींत योग दिसाचो सुवाळो आयोजीत केला. राजभवन पणजी, हाॅटेलां, वॅलनेस सेंटर्स, रेल्वे स्टेशनां, कार्यालयां तशेंच गोंय, महाराष्ट्र आनी कर्नाटक प्रांतांतूय म्हाल पांवड्यार साबार सुवातांनी योग दिसाचें आयोजन श्री दत्त पद्मनाभ पीठाचे वतीन भव्य स्वरुपांत केलां. सगल्यांनी ह्या योग दिसाचे कार्यावळींत वांटेकार जावचें अशें आवाहन तपोभूमीन हे विशीं उजवाडायिल्ल्या पत्रकांतल्यान सगल्या योग साधकांक केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
