भांगरभूंय | प्रतिनिधी
इमारतीचे पत्रे पडून तीन दुचाकींचें लुकसाण
भांगरभूंय । प्रतिनिधी
दिवचलः तडव्या पावसान शेनवारा दिवचल म्हालांत धुमशेण कांडलें. ताचे थेट परिणाम दिवाळीच्या बाजाराचेर जालो.
वादळी वाऱ्या सयत पावस आयिल्ल्यान खूबशा वाठारांनी उदक सांचलें. मयें पंचायत कार्यालयाचे पत्रे तुटून पडिल्ल्यान खाला पार्क केल्ल्या तीन दुचाकींचें लुकसाण जालें. दिवचल उजो पालोवपी दळाचे जवान सांजे उसरां मेरेन मजत कार्य करतले.
जगलावणी आनी गडगड मारून अचकीत आयिल्ल्या पावसाक लागून खूबशा जाणांची धांदळ जाली. शारांत तशेंच गांवगिऱ्या वाठारांतल्या चडशा रस्त्यांचेर उदक भरिल्लें.
हेरशीं सप्टेंबर सोंपताच पावसूय सोंपता. ताका लागून तडवो पावस येतलो असो अदमास आशिल्लो. फाटले कितलेशेच दीस सकाळ आनी सांजे वेळार मळबांत दाट कुपां दाट्टालीं. शेनवारा सांजे वेळार उटंगाराच्या पावसान हाजेरी लायली. अचकीत आयिल्ल्या पावसाक लागून दिवचल आनी सांखळेची बाजारपेठ रोखडीच सामसूम जाली. खूबशा जाणांनी दिवाळी खातीर दुकानां घाल्लीं, तांकां ह्या पावसाचो चड मार बसलो. तडवो पावस रातीं उसरां मेरेन चालूच आशिल्लो. ह्या पावसांत साबार वाठारांनी झाडां पडिल्ल्याची म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
