भांगरभूंय | प्रतिनिधी
बरेच खेपो आमकां आमच्या गोंयांनूच सरकारी तंत्रनिकेतन आसा आनी ते कुशळटाय पदविका अभ्यासक्रम चलयता हाची म्हायती आसताच अशी ना. चड खेपो पॉलिटेक्निकाची वळख ही डिप्लोमा इंजिनियरिंग करपा खातीर अशीच जाल्या, पूण तांचें संकेतस्थळ पळयशात तर अन्न तंत्रज्ञान, गार्मेंट टेक्नॉलॉजी सारखे अभ्यासक्रम आसात आनी ते बाजारांत मागणी आशिल्ले आसात, जे तुमकां स्वताच्या पांयाचेर उबे करूंक शकतात, आत्मनिर्भर करूंक शकता. हाची खात्री कोणूय दितलो. कोरोना काळांत हे कोर्सेस बंद उरले, पूण आतां ते आदले सारके ऑफलायन सुरु जाल्यात. एक खाशेली गजाल म्हळ्यार हरशी तुमकां प्रवेश घेतना प्रवेश परिक्षा दिवशी पडटा, पूण ह्या कोर्सा खातीर तशी अट ना. आमचें गोय हें पर्यटना खातीर प्रसिद्ध आसा. देखून वयले दोनूय कोर्सेस महत्वाचे आसात.
जर एखादो पर्यटक भोंवपाक भायर सरलो, तर ताका भूक लागप हें सभाविक. मागीर तो लागींच्या हॉटेलांत खावपाक चल्लो, थंय ताका नितळसाण तर जायच खेरीज जें अन्न तो पोटांत घालतलो तें लेगीत नितळ जाय. ही अपेक्षा ताणें दवरपाची, कारण तो ताका पयशे मेजता. अन्न तंत्रज्ञानांत तुमकां नेमकें हें शिकचें पडटा. 1963 सावन ह्यो कोर्स हे संस्थेंत सुरु जाला आनी ताचो लाव घेवन जायत्या विद्यार्थ्यांनी स्वताचो उद्योग सुरु केला. कोण नोकरेक लागला. कोण देशा भायर लेगीत पावला. ह्या कोर्सा खातीर धावेचो विद्यार्थी प्रवेश घेवं शकता. बारावी विज्ञान फांटो घेतिल्लो विद्यार्थी जर ताणें विज्ञान, गणित, इंग्लीश हे विशय घेतिल्ले आसात तर तो लेगीत प्रवेशाक पात्र थारता. तांकां हो साडे तीन वर्सांचो कोर्स अडीच वर्सां अभ्यास करून पुरो करपाक जाता तर धावी उत्तीर्ण जाल्ले जे प्रवेश घेतात, तांकां साडेतीन वर्सांचो अभ्यास करचो पडटलो. वट्ट 15 विद्यार्थ्यांक ह्या फाट्यांत प्रवेश मेळटा. आतां लोकां कडे वेळ ना, देखून ते डब्यातलें अन्न खावपाक तयार आसतात. जॅम, जेली, लोणचीं, केच अप, टोमॅटो सॉस तशेच कोला, उदका सारक्यो वस्तू आतां डब्यांनी मेळूक लागल्यात आनी खंय व्हरपाक त्यो सुटसुटीत आसतात, ह्या कारणान कोणूय त्यो व्हरतात. चड दीस त्यो वापरपाक मेळटात. आनी म्हूण तांची लोकप्रीयता दिसान दीस वाडत चल्ल्या. म्हूण हो अभ्यासक्रम म्हत्वाचो आसा. दुदाचे प्रक्रिया केल्ले जिनस तर दरेकल्याक गरजेचे जाल्यात. ते तो देशानुच न्हय तर परदेशान लेगीत वापरूंक लागला.
आतां जायतीं फळां, जांचेर प्रक्रिया जाता तीं योग्य आसात कांय नात? योग्य नासत तर कितें करचें पडटलें हे सारके प्रस्न तुमकां पडूं येतात. ह्या अभ्यासक्रमांतल्यान तुमकां ताचे विशीं समजूं शकता. सरबरायेक लागीं आसपी हो अभ्यासक्रम तुमकां गोंयांनूच न्हय तर गोंयां भायर लेगीत तशेंच देशा भायर लेगीत संद दिवं शकता. आतां वयर म्हटल्या त्या प्रमाण पर्यटकांकूच न्हय तर साबार लोकांक वेळ ना. म्हूण फास्ट फूड जल्माक आयलें. हाका जंक फूड लेगीत म्हणतात. आहार तज्ञांनी हें चड खावं नाका म्हळें तरी जंक फूड तरणाट्यां मदीं लोकप्रीय आसा. देखून तर अन्न तंत्रज्ञान ह्या अभ्यासक्रमांक महत्व आयलां. अडीच वर्सांचो हो कोर्स सेमिस्टर पद्धतीन फुडें वता. तुमी ह्या अभ्यासक्रमाची चड म्हायती संकेतस्थळा वेल्यान घेवं शकतात. ताचे खातीर तुमी ह्या संकेतस्थळाक ( http://www.gpp.goa.gov.in/) जरूर भेट दिवची, नाजाल्यार ह्या फाट्यांत शिकोवपी ह्याच कॉलेजीचो आदलो विद्यार्थी प्रा जावेद बेग (8766012189) हांचे कडेन संपर्क करू येता. हे अभ्यासक्रम तुमकां नोकरी किंवा स्वताच्या पायांचेर उबो रावपाक मजत करूं शकतात. ह्या कोर्साचो विचार करचे पयलीं तुमी ह्या फांट्याचे विद्यार्थी कितें करतात? हे प्रत्यक्ष पणजेच्या संस्थेक भेट दिवन जरूर पळयात आनी मागीर कितें तो निर्णय घेयात.
प्रा. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.