भांगरभूंय | प्रतिनिधी
काणकोण: खोतीगांव पंचायत वाठारांतल्या नडकें गांवांतल्या शेतांनी अचकीत उदक घुशिल्ल्यान सुमार 11 शेतकारांची भाताची शेतां पेड्डेर जालीं. परंपरीक व्हाळान आपल्या उदकाचें पात्र सोडून नव्यान पात्र धारण केल्ल्यान शेतकारांचें व्हड प्रमाणांत लुकसाण जालें.
काल (सोमारा) नडकें गांवाची पळोवणी काणकोणचे उपजिल्होधिकारी रमेश गांवकार, मामलेदार मनोज कोरगांवकार, विभागीय कृशी अधिकारी कविराज नायक गांवकार, उदका स्रोत कचेरेचो अभियंतो किशोर परवार, मामलेदार कचेरेचे सर्कल इन्स्पेक्टर रोहिदास गांवकार हांणी केली.
कृशी खात्याच्या अधिकाऱ्यांनी 11 शेतकारांच्या शेतांचे लुकसाण जाल्ल्याचो तपशील तयार करून घेतला. जाल्यार उदका स्रोत खात्या वतीन कशी उपाय येवजण करूंक मेळटली हाचेर विचार विनिमय सुरू आसा.
शेतांचें लुकसाण जाल्ल्या शेतकारांक शेतकार आधार निधी येवजणे खाला एक हॅक्टर प्रमाण 40 हजार रुपया लुकसाण भरपाय दिवपाचो विचार आशिल्ल्याचें विभागीय कृशी अधिकारी कविराज नायक गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
