भांगरभूंय | प्रतिनिधी
फाल्यांच्यान कारवाय, दंडात्मक वा बंदखणीची तजवीज
भांगरभूंय I प्रतिनिधी
पणजी : विविध शारांनी बसयिल्ल्या सीसीटीव्ही कॅमेऱ्या वरवीं सोरो पियेवन तशेंच वेगान वाहनां चलोवपी वाहन चालकांचेर नदर दवरून तांकां सुदारीत मोटार वाहन कायद्यांतले तजविजे प्रमाण तालांव दिवपाचो निर्णय येरादारी खात्यान घेतला. ह्या निर्णयाची अंमलबजावणी आॅगस्टाच्यान सुरू जातली, अशी म्हायती येरादारी खात्याचे संचालक राजन सातार्डेकार हांणी शेनवारा आमच्या प्रतिनिधी कडेन उलयतना दिली.
हालींच जुवारी पुलाचेर बुधवारा मध्यान रातीं घडिल्ल्या अपघाताक लागून चार जाणांक मरण आयिल्लें. ते उपरांत सरकार जागे जालां. येरादारी, पुलीस ह्या खात्यांनी वाडट्या अपघातांचेर नियंत्रण दवरपाक राज्यांत आनीक उपाय येवजण्यो आंखपाचेर भर दिला. सोरो पियेवन वाहन चलोवप तशेंच वेगान वाहन चलोवन हेरांचो जीव धोक्यांत घालपी चालकांचेर नियंत्रण दवरपाक येरादारी खात्यान सुदारीत मोटार वाहन कायद्यांतले तजविजे प्रमाण कारवाय करपाचो निर्णय घेतला. ते खातीर अशा वाहन चालकांचेर व्हड दंडात्मक वा बंदखणीची ख्यास्त जातली.
ऑगस्टाच्यान पणजी, म्हापशें तशेंच हेर शारी वाठारांनी बसयिल्ल्या सीसीटीव्ही कॅमेऱ्यांत सोरो पियेवन वाहन चलोवपी चालकांचेर नदर आसतली. तांकां सुदारीत मोटार वाहन कायद्यांतले तजविजे प्रमाण तालांव दितले, अशें संचालक राजन सातार्डेकार हांणी सांगलें.
राज्यांतले वाडटे अपघात आडावपाक येरादारी पुलिसां कडल्यान गोंयभर जागृताय करतले. सुदारीत मोटार वाहन कायद्याचीय गोंयांत अंमलबजावणी सुरू केल्या. ताका लागून फाटल्या कांय म्हयन्यांत अपघातांचें प्रमाण उणें जालां. जुवारी पुलाचेर जाल्लो अपघात हाका आडवाद आसा. अशे अपघात आडावपाक फुडल्या कांय म्हयन्यांत राज्यभरांत सीसीटीव्ही कॅमेरे बसोवन वेगाचेर नियंत्रण दवरपी यंत्रणा उबारतले. रातींची गस्त वाडोवन पुलीस, येरादारी पुलीस नदर दवरतले. हे विशीं फुडल्या सप्तकांत येरादारी मंत्री मॉवीन गुदिन्हो बसका घेतले, अशी म्हायतीय सातार्डेकार हांणी दिली.
मजगतीं, जुवारी पुला वयल्यान न्हंयेंत मोटार पडून जाल्ल्या अपघाता उपरांत सरकार सादूर जालां. रातच्या वेळार जावपी 95 टक्के अपघाताक साेऱ्याचें घुंवळेंत वाहन चलोवप हेंच कारण आसा, असो दावो मुख्यमंत्री डॉ. प्रमोद सावंत हांणी केल्लो. ते भायर हाचेर नियंत्रण दवरपाक कायदो दुरुस्ती करतले, अशेंय तांणी नमूद केलां.
सुदारीत मोटार वाहन कायद्या प्रमाण मर्यादे भायर वेगान वाहन चलयल्यार पांच हजार रुपवा वा ताचे परस चड दंड वा तीन म्हयन्यांची बंदखणीची ख्यास्त जावं येता.
सोऱ्याचें घुंवळेंत वाहन चलयल्यार 10 हजार रुपया वा ताचे परस चड दंड वा 6 म्हयन्यांची बंदखणीची ख्यास्त जावं येता. मात होच गुन्यांव परतून घडल्यार 15 हजार रुपया वा ताचे परस चड दंड वा दोन वर्सांची बंदखणीची ख्यास्त जावं येता, अशी तजवीज कायद्यांत अासा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
