भांगरभूंय | प्रतिनिधी
भांगरभूंय I प्रतिनिधी
पणजी : सोरो पियेवन वाहनां चलोवप्यां आड पुलीस खात्यान कारवाय सुरू केल्या. मंगळारच्या पयल्याच रातीं पुलिसांनी उत्तर आनी दक्षीण गोंयांत मेळून 31 जाणांचेर कारवाय करून तांचे परवाने जप्त केल्यात. ह्या दोशींक सुदारीत मोटार वाहन कायद्या प्रमाण, 6 म्हयन्यांची बंदखण वा 10 हजार रुपयांची दंडात्मक कारवाय जावपाक
शकता.
जुवारी पुलाचेर फाटल्या सप्तकांत घडिल्ल्या भिरांकूळ अपघातांत चवगांक मोटार न्हंयेंत पडून बुडून मरण आयिल्लें. ते उपरांत आनीकूय कांय वाहनांचे अपघात रातच्या वेळार घडल्यात. सोऱ्याचें घुंवळेंत वेगान वाहन चलयिल्ल्यान हे अपघात घडल्यात हे स्पश्ट जाल्ल्यान पुलीस खात्यान रातच्या वेळार मोहीम सुरू केली. पुलिसांचे शिटकावणे उपरांत मंगळारा रातीं राजधानी पणजे सयत विवीध शारांनी पुलिसांनी रातची गस्त वाडयली आनी दुबावितांची अल्कोमिटराचे मजतीन तपासणी केली. तातूंत मंगळारा रातीं कडेन 31 जाण सोरो पियेवन वाहनां चलयताले हे सिद्ध जाल्ल्यान तांचे परवाने पुलिसांनी जप्त केल्यात.
मजगतीं, गोंयांत रातच्या वेळार घडपी अपघात आडावपाक कायद्यांत बदल करतले, अशें मुख्यमंत्री डॉ. प्रमोद सावंत हांणी कांय दिसां पयलीं जाहीर केल्ले. ताचे पयलींच पुलीस खात्यान रातच्या वेळा वयलीं वस्त वाडोवन सोरो पियेवन वाहन चलोवपी चालकां आड कारवाय करपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
