भांगरभूंय | प्रतिनिधी
– राज्यपालः राजभवना वतीन डॉ. प्रकाश पर्येकार हांचो भोवमान
वाळपयः सत्तरीचे सुपूत आनी गोंय विश्वविद्यालयांतल्या कोंकणी विभागाचे उप मुखेली प्रकाश पर्येकार हांकां केंद्रीय साहित्य अकादेमीचो पुरस्कार फावो जाल्ले खातीर राजभवना वतीन तांचो राज्यपाल श्रीधरन पिल्लई हांणी भोवमान केलो. राजभवनांत आयोजीत कार्यावळींत राज्यपालां हस्तुकीं शाल, श्रीफळ भेटोवन तांकां सन्मानीत केले.
ह्या वेळार कला आनी संस्कृती मंत्री गोविंद गावडे, ज्ञानपीठ पुरस्कार जैतिवंत दामोदर मावजो आनी गोंय विद्यापिठाचे कुलगुरू हरिलाल मेमन हाजीर आशिल्ले.
ह्या वेळार उलयतना राज्यपाल पिल्लई हांणी म्हणलें, प्रकाश पर्येकार हांकां साहित्य अकादेमीचो पुरस्कार फावो जाल्ल्यान गोंयची प्रतिश्ठा वाडल्या. पुराय ग्रामीण जिणेंत व्यथीत आशिल्ल्यो समस्या मांडपाचें कार्य तांणी ‘वर्सल’ कादंबरींत केला. तांच्या लिखणांत ग्रामीण जिणेंतलो संघर्श आसा. जीण जगपाक गरजेच्या आशिल्ल्या संघर्शाचें वर्णन तांणी वर्सल कादंबरीत केलां. ते खातीर हे कादंबरीक मेळिल्लो पुरस्कार गोंयच्या ग्रामीण वाठारांतल्या जिणेचो हुंकार आशिल्ल्याचे राज्यपाल पिल्लई हांणी सांगलें.
सत्तरी म्हालांतली ग्रामीण जीण वेगळ्या स्वरुपाची आसा. दरेक घटक हो संघर्शाच्या बळाचेर जीण जगता. संर्घाच्या माध्यमांतल्यान आपली जीण जगपाचो यत्न करता. ताका लागून वर्सल कादंबरीच्या माध्यमांतल्यान तांणी ग्रामीण वाठारांतल्या जिणेचो संघर्श मांडला, ते खातीर केंद्रीय साहित्य अकादेमीन बऱ्या कार्याची दखल घेतिल्ल्याची प्रतिक्रिया राज्यपालांनी उक्तायल्या.
कला आनी संस्कृती मंत्री गोविंद गावडे हांणी म्हणलें, प्रकाश पर्येकार हांच्या संघर्शाच्या जिणेचे वाटेर तांणी आतां मेरेन मेळयिल्ले येस ही तांच्या तळमळीची पोचपावती आसा. प्रकाश पर्येकार हे तळमळी व्यक्तीत्व. तांणी भुरगेपणा सावन ते आतां मेरेन ग्रामीण वाठारांतल्या जिणेचे प्रत्यक्षपणान घेतिल्ले अणभव तांच्या कादंबरीच्या माध्यमांतल्यान लिखीत स्वरूपांत समाजा मुखार हाडल्यात. ही कादंबरी दरेकल्यान वाचची. वाचनाच्या माध्यमांतल्यान दरेकल्याक संघर्शाच्या बळाचेर आस्त दाखोवपी मार्ग सोदपाचो पर्याय मेळटलो.
आपले मनोगत उक्तायतना प्रकाश पर्येकार हांणी सांगलें, सत्तरींतल्यी ग्रामीण जीण ही संघर्शाच्या बळार सुरू आसा. दरेक घटक संघर्शाच्या बळार अापली जीण जगता. दरेकल्याच्या संघर्शांत तळमळ आसा. ही तळमळ आपूण लेखनाच्या माध्यमांतल्यान उक्तावपाचो यत्न केला. हे कादंबरीची दखल घेवन आपणाक पुरस्कार दिल्ले खातीर साहित्य अकादेमीचो उपकारी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
