भांगरभूंय | प्रतिनिधी
सरकारी अधिकाऱ्यांक फोंडें उपजिल्होधिकाऱ्याचो आदेश
फोंडें: फोंडें म्हालांत ऑगस्ट म्हयन्यांत वाडट्या डेंग्यू दुयेंतींची दखल घेवन उपजिल्होधिकारी सुयश सिनाय खांडेपारकार हांच्या मार्गदर्शना खाला खासा बसका घेतली. डेंग्यूचेर नियंत्रण दवरपा खातीर सगल्या सरकारी खात्याच्या अधिकाऱ्यांनी भलायकी खात्याच्या अधिकाऱ्यांक सहकार्य करचें. तशेंच दरेक पंच वांगड्यांनी जबाबदारी घेवन आपल्या प्रभागांचेर लक्ष दवरपाचो आदेश ह्या वेळार उपजिल्होधिकाऱ्यांनी दिलो.
बसकेंत गोवा कॅनाचे रोलंड मार्टीन, फोंडें मुळावे भलायकी केंद्राचे भलायकी अधिकारी डॉ. स्मिता पार्सेकार, नितळसाण विभागाचे निरिक्षक मनोज नायक आनी हेर अधिकारी हाजीर आशिल्ले.
ह्या वेळार अदीक म्हायती दितना रोलंड मार्टीन हांणी ऑगस्ट म्हयन्यांत फोंडें म्हालांत डेंग्यू दुयेंती मदीं सुमारा भायर वाड जाल्या. वाठारांतल्या सगल्या मुळाव्या भलायकी केंद्रांतले अधिकारी काम करीत आसतात. पूण थळाव्यो पंचायती आनी पालिके कडल्यान अधिकाऱ्यांक सहकार्य मेळप गरजेचें आसा. चवथीचे परबे पयलीं डेंग्यू मुक्त करपाचो यत्न दरेक पंच वांगड्यान करूंक जाय. तशेंच 30 सप्टेंबर आनी 1 आनी 2 ऑक्टोबर दिसा म्हालांतल्या पंचायतींतलो आनी पालिका वाठटारांतलो कोयर एकठांय करून नितळसाण मोहीम राबोवपाची गरज आशिल्ल्याचें तांणी सांगलें.
उपजिल्होधिकारी सुयश सिनाय खांडेपारकार हांणी म्हालांतल्या सगल्या बांयांची नोंदणी करपाचे आदेश उदका स्रोत खात्याक दिवपाचे आसात. तशेंच उद्देगीक वसणुकेंत काम करपी सगल्या कामगारांची म्हायती आयडीसीन लागसारच्या भलायकी खात्याक दिवप गरजेची आसा. म्हालांतल्या गट विकास अधिकाऱ्यां वतीन दरेक पंचायत वाठारांत पंचांक सादुरताय बाळगुपा खातीर पत्र वेव्हार करतले अशें सांगलें.
मजगतीं, फोंडें म्हालांत ऑगस्ट म्हयन्यांत सगल्यांत चड डेंग्यूचे 19 दुयेंती मडकय मुळाव्या भलायकी केंद्रांत सांपडले. बेतकी-खांडोळें मुळाव्या भलायकी केंद्रांत 15, फोंडें भलायकी केंद्रांत 7 दुयेंती जाल्यार शिरोडें मुळाव्या भलायकी केंद्रांत 3 दुयेंती सांपडले.
कांय वर्सां उपरांत मडकय मुळाव्या भलायकी केंद्रात पयलोच मलेरियाचो एक दुयेंती सांपडलो. मजगतीं, सगल्या मुळाव्या भलायकी केंद्रा वतीन दुयेंती सांपडिल्ले सुवातेर जागृताय तशेंच वखदांचो फावारो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
