भांगरभूंय | प्रतिनिधी
पयशे मोडून हाडिल्लें टँकरांतलें उदक ओंतून उडोवपाक बेतोडकारांचो न्हयकार
भांगरभूंय । प्रतिनिधी
फोंडें: दत्तगड- बेतोड्यां डेंग्यूचे दोन दुबावीत दुयेंती सांपडिल्ल्यान भलायकी खात्याच्या अधिकाऱ्यांनी सतर्कताय बाळगून लोकांक जागृत करपाचो यत्न चलयला. पूण स्वताच्या बोल्सांतले पयशे मोडून टँकरांतल्यान हाडिल्लें उदक भायर उडोवपाक लोक विरोध करतात. हाका लागून भलायकी खात्याच्या अधिकाऱ्यांचो थळाव्या लोकां कडेन वाद जावपाक लागला. डेंग्यूचो प्रसार आडावपा खातीर उदका पुरवण बांदकाम खात्यान नळांतल्यान सुरळीत उदका पुरवण करपाची खर गरज आसा.
दत्तगड वाठारांत नळांतल्यान उदका पुरवण जायनाशिल्ल्यान फाटल्या कांय दिसांच्यान लोकांक बोल्सांतलें पयशें मोडून टँकरांतल्यान उदक हाडचें पडटा. टँकराचें उदक घरा मुखार दवरिल्ल्या आयदनांनी सांठोवन दवरतात. ताका लागून डेंग्यूचो प्रसार जाल्ल्याचो दुबाव भलायकी खात्याच्या अधिकाऱ्यांनी उक्तायला. पूण लोकां मदीं जागृताय करपाक गेल्ल्या भलायकी खात्याचे अधिकारी तशेंच कर्मचाऱ्यांचो थळाव्या लोकां कडेन वाद जावपाक लागला.
लोकां मदीं जागृताय करतना भलायकी खात्याच्या अधिकाऱ्यांनी तशेंच कर्मचाऱ्यांनी घरा मुखार कितल्याश्याच दिसां सावन आयदनांनी सांठोवन दवरिल्लें उदक ओतून उडोवपाक सुरवात केली. पूण नळांतल्यान उदक येनाशिल्ल्यान स्वताचे पयशे मोडून हाडिल्लें उदक भायर ओतून उडोवपाक विरोध करपाक लागल्यात.
दोन वर्सां आदीं लेगीत दत्तगड वाठारांत घरा मुखार आयदनांनी उदक सांठोवन दवरिल्ल्यान 8 ते 10 डेंग्यूचे दुबावीत दुयेंतीं सांपडिल्ले. त्या वेळार फोंडें मुळाव्या भलायकी केंद्रा वतीन स्थिती नियंत्रणांत दवरिल्ली. तेन्ना लेगीत थळाव्या लोकांक नळांतल्यान उदक मेळानाशिल्ल्यान स्वताचे पयशे मोडून टँकरांतल्यान उदक हाडचें पडटालें.
आयदनांनी 6 दिसां परस अदीक काळ उदक सांठोवन दवरिल्ल्यान त्या वेलार भलायकी खात्याच्या अधिकाऱ्यांक आनी कर्मचाऱ्यांक उदकांत जंतू सांपडिल्ले. ताका लागून सांठोवन दवरिल्ल्या उदकाचो परिणाम थळाव्या लोकांक दुबावीत डेंग्यूच्या रुपान सोंसचो पडिल्लो. फोंडें मुळाव्या भलायकी केंद्राच्या नितळसाण विभागाचे निरिक्षक मनोज नायक हांणी दत्तगड वाठारांत डेंग्यू विशीं जागृताय करपाचेर अदीक भर दितात. तशेंच खूबश्या घरां मुखार सांठोवन दवरिल्लें उदक ओंतून उडयतात.
स्थिती नियंत्रणांत दवरपाचो यत्नः डॉ. स्मिता पार्सेकार
दोन वर्सां आदीं दत्तगड वाठारांत कितलेशेच डेंग्यूचे दुबावीत दुयेंती सांपडल्या उपरांत स्थिती नियंत्रणांत दवरपांत येस मेळयिल्लें. तेच धरतेर हे खेपेय परतून स्थिती नियंत्रणांत दवरचे खातीर भलायकी खातें यत्न करता, अशें भलायकी अधिकारी डॉ. स्मिता पार्सेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
