डुडू सुटका: पुलिसांचें खंडपिठांत आव्हान; आयज सुनावणी

भांगरभूंय | प्रतिनिधी

पणजी: उत्तर गोंय जिल्हो आनी सत्र न्यायालयान ड्रग्स तस्करी प्रकरणांत इस्रायली नागरीक डेव्हीड डिहम उर्फ डुडू ह्या दुबाविताची निर्दोश सुटका केल्या. जाल्यार तेन्नाच्या सात पुलीस कर्मचाऱ्यांचेर आरोप निश्चीत करपाचो आदेश दिल्लो. ह्या आदेशाक पांच पुलीस कर्मचाऱ्यांनी मुंबय उच्च न्यायालयाच्या गोंय खंडपिठांत आव्हान दिलां. ह्या प्रकरणाची फुडली सुनावणी आयज (सोमारा) जातली.

गोंय पुलिसांच्या घुंवळे वखदां विरोधी पंगडान (एएनसी) 21 फेबुवारी 2010 दिसा मध्यान रातीं 11.35 वरांचेर हणजूण्यां सेंट अँथनी चॅपेला कुशीक धाड घालून डुडूक ताब्यांत घेतिल्लो. कारवायेंत ताचे कडल्यान 2 लाख 71 हजार 500 रुपया मोलाचें 4.4 ग्राम हिरॉयन, 5.34 ग्राम कोकेन, 4.31 ग्राम लिक्वीड एलएसडी, 1.16 कील चरस जप्त केल्ल्याचें ‘एएनसी’न नमूद केल्लें.

ह्या प्रकरणांत ‘एएनसी’न घुंवळे वखदां विरोधी कायद्याच्या कलम 20 (बी) (ii) (सी), 21 (ए) (बी) आनी 23 (सी) खाला गुन्यांव दाखल करून डुडूक अटक केल्ली. उपरांत न्यायालयांत डुडू आड आरोपपत्र लेगीत दाखल केल्लें.

डुडूचे अटके उपरांत गोंयांत खवदळ पडिल्लो. हातूंत पुलीस अधिकाऱ्यां सयत मंत्र्यांच्या सोयऱ्यांचेरूय आरोप जाल्ले. त्याच वेळार डुडून आपले आड ‘एएनसी’न फटीचो गुन्यांव दाखल केल्ल्याचो दावो केल्लो.

मजगतीं, काँग्रेस फुडारी सुनील कवठणकार हांचे सयत तिगांनी ह्या प्रकरणांत मुंबय उच्च न्यायालयाच्या गोंय खंडपिठांत जनहीत याचिका दाखल केल्ली. तातूंत तांणी राजकारणी, पुलीस आनी डग्स तस्करां मदीं साटेलोटे आशिल्ल्याचो दावो करून डुडू प्रकरण तपासा खातीर केंद्रीय गुन्यांव विभागा कडेन (सीबीआय) दिवपाची मागणी केल्ली. ते प्रमाण उच्च न्यायालयान ह्या प्रकरणाची चवकशी सीबीआय कडेन दिवपाचे निर्देश दिले. उपरांत सरकारान हें प्रकरण सीबीआय कडेन सोंपयिल्लें.

ह्याच वेळार न्यायालयांत सुनावणी जाली तेन्ना 1 जून 2011 दिसा न्यायालयान डुडू आड आरोप निश्चीत करपाचो आदेश जारी केल्लो. उपरांत सीबीआयन प्रकरणाचो परतून तपास करून न्यायालयांत पुरवणी आरोपपत्र दाखल केलें. तातूंत सीबीआयन न्यायदंडाधिकाऱ्या मुखार पंचांची साक्ष लेगीत नोंद करून घेतली. त्या वेळार ही धाड घाली तेन्ना आपूण घडणूक थळार हाजीर नाशिल्याचो दावो केलो. धाडींत वांटेकार आशिल्ल्या पुलिसांचे कॉल रिकॉर्ड आनी सुवाताची तपासणी करीत डुडूच्या शेजरा रावत आशिल्ल्याचेंय जबाब नोंद केल्ले. तातूंत डुडूचे डग्स प्रकरण बनावट आशिल्ल्याचें मुखार आयिल्ल्याचें पुरवणी आरोपपत्रांत नमूद केलें.

सीबीआयन धाडींत वांटेकार आशिल्ल्या सगल्या पुलीस अधिकाऱ्यां आड षडयंत्र रचप, बनावट गुन्यांव दाखल करप, न्यायालयाची दिशाभूल करप हाचे सयत हेर आरोप करून सात पुलीस कर्मचाऱ्यांची नांवां पुरवणी आरोपपत्रांत नोंद केल्लीं.

न्यायालयांत सुनावणी जाले उपरांत न्यायालयान सीबीआयन दाखल केल्ल्या पुरवणी आरोपपत्राची दखल घेवन दुबावीत डुडू हाची आरोपांतल्यान सुटका केली. तशेंच तेन्नाचे पुलीस उपअधिक्षक नरेश म्हामल, पुलीस उपनिरिक्षक सुनील गुडलर हांचे सयत इर्मिया गुरैया, समीर वारखंडकार, महादेव नायक, नागेश पार्सेकार, महाबळेश्वर सावंत ह्या सात पुलीस कर्मचाऱ्यां आड आरोप निश्चीत करपाचो आदेश दिलो.

ह्या आदेशाक इर्मिया गुरैया, समीर वारखंडकार, महादेव नायक, नागेश पार्सेकार, महाबळेश्वर सावंत या पुलीस कर्मचाऱ्यांनी खंडपिठांत आव्हान दिलां. तातूंत तांणी राज्य सरकार- एएनसी, इस्रायली नागरीक डेव्हीड डिहम ऊर्फ डुडू हाचे सयत तेन्नाचे पुलीस उपअधिक्षक नरेश म्हामल, पुलीस उपनिरिक्षक सुनील गुडलर हांकां प्रतिवादी केल्यात. ह्या प्रकरणाची फुडली सुनावणी 4 सप्टेंबराक जातली.