भांगरभूंय | प्रतिनिधी
भांगरभूंय I प्रतिनिधी
पणजी : मडगांवां रवींद्र भवनांत 10 ते 14 नोव्हेंबर 2022 मजगतीं आयोजीत कोसंबी विचार महोत्सव फुडें धुकल्ला. कांय कारणांक लागून हो महोत्सव फुडें धुकलिल्ल्याची नोटीस सरकारान जारी केल्या. नव्यो तारको मात जाहीर जावंक नात. अचकींत हो महोत्सव फुडें धुकलिल्ल्यान विचारवंतांनी तिडक उक्तायल्या.
हो महोत्सव 10 नोव्हेंबर ते 14 नोव्हेंबर काळांत मडगांवां रवींद्र भवनांत आयोजीत केल्लो. महोत्सव फुडें धुकलपाच्या निर्णया उपरांत सोशल माध्यमां वयल्यान जायत्या जाणांनी टिका केल्या.
ज्ञानपीठकार साहित्यीक दामोदर मावजो, प्रा. माधवी मेनन, डॉ. देवदत्त पटनायक, डॉ. सुरज येंगडे आनी प्रा. प्रणय लाल हांची व्याख्यानां अंदूं ह्या महोत्सवांत जावपाची आसली.
डी. डी. कोसंबी विचार महोत्सव 2008 वर्सा सावन सुरू जालो. कोरोनाचे वर्स सोडले जाल्यार दर वर्सा हो महोत्सव जाला. हाचे पयलीं सगले खेपे हो महोत्सव पणजे कला अकादमींत जाला. पयलेच खेपे हो महोत्सव मडगांवां रवींद्र भवनांत जावपाचो आशिल्लो. पूण निमाण्या वेळार तो फुडें धुकल्ला. हाका लागून विचारप्रेमी नागरिकांची निरशेवणी जाल्या. डॉ. रघुनाथ माशेलकार, दलाई लामा, किरण बेदी, सर्गेस्त एपीजे अब्दुल कलाम, पी. साईनाथ, गिरीश कर्नाड, मेधा पाटकर, हमीद अन्सारी, नारायण मुर्ती हे सारक्या विचारतज्ञांची व्याख्यानां महोत्सवांत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
