भांगरभूंय | प्रतिनिधी
नवी दिल्ली, खबरां संस्था: गृह मंत्रालयान बुधवारी राज्यसभेंत सांगलें, सायबर क्रायम कोऑर्डिनेशन सेंटर (I4C) न डिजिटल अटक प्रकरणांत वांटेकार आशिल्ल्या ३,९६२ परस चड स्कायप आयडी आनी ८३,६६८ व्हॉट्सॲप खात्यांचीं वळख पटोवन ते ब्लॉक केल्यात. आय ४ सी ही सायबर गुन्यांवांचेर लक्ष दवरपा खातीर गृह मंत्रालयाचो एक विशेश फांटो जावन आसा.
द्रविड मुन्नेत्र कळघम (द्रमुक) खासदार तिरुची शिवा हांणी विचारिल्ल्या प्रस्नाचे जापेंत गृह राज्यमंत्री संजय बंदी कुमार हांणी ही लेखी म्हायती दिली. तांणी म्हणलें, सायबर गुन्यांवकारांनी ईडी, सीबीआय सारकिल्ल्या एजन्सीचे अधिकारी आशिल्ल्याचें भासोवन फटींगपणां करपा खातीर ह्या खात्यांचो वापर केला.
तशेंच, २८ फेब्रुवारी २०२५ मेरेन ७.८१ लाखां परस चड सिम कार्ड आनी २.०८ लाखां परस चड आयएमईआय नंबर ब्लॉक केल्यात. तेन्नाच, १३.३६ लाखां परस चड कागाळींच्या आदारार, ४३८६ कोटी रुपयां परस चड मोलाचें लुकसाण चुकलें.
स्पूफ कॉल वळखुपाक सिस्टम सज्ज
गृह राज्यमंत्र्यांनी सांगलें, केंद्र सरकार आनी दूरसंचार सेवा प्रदात्यांनी (TSP) आंतरराष्ट्रीय स्पूफ कॉल वळखपा खातीर आनी ब्लॉक करपा खातीर एक प्रणाली विकसीत केली.
जेन्ना अशे कॉल येतात तेन्ना मोबायलाचेर भारतीय नंबर दिसता, जरी तो कॉल परदेशांतल्यान येता तरी. टीएसपींक अशे कॉल ब्लॉक करपाचे नर्देश दिल्यात.
तशेंच सायबर गुन्यांवां विशीं कागाळ करपा खातीर १९३० हो टोल-फ्री हेल्पलायन नंबर सुरू केला. जागरूकताय वाडोवपा खातीर प्रादेशीक भाशांनी जागरूकताय वाडोवपी कॉलर ट्यून प्रसारीत करतात.
१० वर्सांनी ४.६९ लाख कोटी रुपयांचें लुकसाण
रिझर्व्ह बँकेच्या एका अहवाला प्रमाण २०२३ त देशांत ३० हजार कोटी रुपयां परस चड फटींगपणां जालीं. तेन्ना फाटल्या १० वर्सांनी बँकांनी सायबर फटींगपणाचीं ६५,०१७ प्रकरणां नोंद जालीं. जातूंत वट्ट ४.६९ लाख कोटी रुपयांचें लुकसाण जालें.
अनवळखी व्हिडिओ कॉल घेव नाका, काळजी घेयात
सायबर तज्ज्ञांच्या मता प्रमाण, आयज काल सायबर गुन्यांवांत व्हॉट्सअॅपचो वापर वाडला. आमी सोशल मीडिया ऍप्स आनी व्हॉट्सअॅपार जतनाय घेवपाक जाय. तशेंच अनवळखी व्हिडिओ कॉल्स घेवचे न्हय.
फेसबुक, इंस्टाग्राम प्रोफायल खाजगी दवरात. अनवळख्यांनी धाडिल्ल्यो फ्रेंड रिक्वेस्ट स्वीकार करच्यो न्हय. चडश्या प्रकरणांत, सायबर गुन्यांवकार गुन्यांव करचे पयलीं ह्या सोशल सायटां वयल्यान लोकांची म्हायती एकठांय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
