डायरी बरोवप एक बरी संवय

भांगरभूंय | प्रतिनिधी

डायरी म्हळ्यार आमचो स्वभाव दाखोवपी आरसो! आमच्या मनांत जसो अणभव येता तसो आमी तो बरयतात. आमचे विचार बरयतात. तातूंतल्यान मन थीर जाता. रिलॅक्स जाता.

आ यचे व्यस्त जिणेंत लोकांक आपल्याच लोकां खातीर वेळ मेळना. अशा वेळार आमी डायरी वरवी व्यक्त जावपा शकतात. तुमचे विचार मुक्तपणान डायरींत बरोवन दवरल्यार तुमकां बरी न्हीद येता. स्वता कडेन सगळ्या गजालींची नोंद दवरपाक मेळटा. आपल्या मनशांचे संबंदीत म्हत्वाचे दीस, वाडदीस लक्षान उरतात.
म्हाका दिसता, डायरी बरोवप ही एक कला. नवे डायरींत स्वताच्या हातान बरोवपाची खोस सुखद आसता. केन्ना केन्नाय ते डायरीचोय उपेग करून सुखाच्यो, येसस्वीपणाच्यो सकारात्मक गजाली नोंद करपाक मेळटात. कॉलेजींतल्या चलयेची डायरी आनी घरकान्नीची डायरी हातूंत व्हडलो फरक आसा.
डायरी बरोवपाक भास, शैली, शब्द मर्यादा, सुवात, वेळ हांची मर्यादा ना. आमची परतून वळख करून दिवपी डायरी म्हाका खूब आवडटा. आमी हेरांक सांगूंक शकनात तें सगळें गुलाबी रंगाच्या डायरींत बरयल्लें आसता. डायरींत मनांतल्यो गजाली बरोवन वा व्यक्त करून समाधानाची जाणविकाय जाता.
सुसंगतीक एक संवय जाय पडटा. तुमकां दिसता तशें तुमचे विचार डायरींत बरोवन दवरप बरें. आमी विचार करतात ते पद्दतीन, जें अणभवतात तें आमी डायरींत बरयतात. आमचे डायरीचें रूप आमचे विचार सकारात्मक वा नकारात्मक हाचेर आदारून आसतात. हे डायरींत आमकां प्रेरणा दिवपी जायत्यो घडणुको आमी बरोवंक शकतात.
एक परिक्षक म्हणून स्वताच्या जिविताक पळोवपाची आमकां सवय जाता आनी आमी सदांच अपडेट जायत रावतात. आमी खंय बरें केलां, खंय चुकीचें केलां तें पळोवंक मेळटा आनी आमी स्वताक सुदारूंक शकतात. आमची तांक कितें तेंय आमकां कळटा.
आयज तुमका कितें बरें दिसलें? ते तुमच्या डायरीक सांगपाचें. खूब बरे दिसतलें जिवाक. पुराय दिसाच्यो घडणुको आमचे डायरींत बरयतना परत वाचता म्हणसर नवे विचार आमच्या मनान येवपाक लागतात. दीस सोंपता म्हणसर आमी आमचीं फुडाराचीं येवजण्यो नोंद करतात. आमकां मेळिल्ले अणभव. सद्याचे परिस्थिती विशीं गजाली तशेंच आमच्या दिसाच्या कार्यावळींचो नियाळ डायरींन बरोवचो. म्हाका दिसता तुमी तुमचे डायरीक तुमचो इश्ट म्हणून वागोपाक जाय वा इश्टिणीक फाटीं सरनासतना आनी तिचे वांगडा काळजांतलें बरें तें सामकें मुक्तपणान उक्ते करूंक जाय.
आमी स्वता बरयिल्ले डायरीचीं पानां आमकां प्रेरणा दिवपाचें काम करतात. डायरी बरयल्यार तुमची याद सुदारता. डायरी आमकां आमच्या जिविताचो आरसो दाखयता आनी मुखार वचपाची वाट कशी तयार करची हाचेर मार्गदर्शन करता. आपले विचार आनी भावना डायरींत बरोवन दवरल्यार इतलें बरें दिसता. भोंवतना लेगीत डायरी आपले वांगडा व्हरपाक जाय. जातूंत आमी मनांतले विचार सहजपणान नोंद करूं शकतात.
डायरी म्हळ्यार आमचो स्वभाव दाखोवपी आरसो! आमच्या मनांत जसो अणभव येता तसो आमी तो बरयतात. आमचे विचार बरयतात. तातूंतल्यान मन थीर जाता. रिलॅक्स जाता. जेन्ना आमी आमचे विचार डायरींत नोंद करतात तेन्ना आमी नव्या संवसारांत प्रवेश करतात. आनी आमी वर्तमानाचेर बरे तरेन लक्ष केंद्रीत करूंक शकतात. भलायके खातीरय डायरी बरोवप ही एक बरी संवय अशें म्हाका दिसता. कारण डायरींत कोणाक वांटून घेवंक मेळना त्यो गजाली आमी आमच्या मनांन उलयत डायरेन बरोवंपाक शकतात. तातूंतल्यान आमकां आमच्या जिवाक ताजेंपण येता. न्हीद बरी येता. शांती मेळटा. डायरी जीवनाक बरी दिका दिवंक शकता.

गौरी भालचंद्र
9422373926