भांगरभूंय | प्रतिनिधी
आमदार मायकल लोबोः कळंगूटे बेकायदो गजालीं आड मूक मोर्चो
भांगरभूंय । प्रतिनिधी
म्हापशें: कळंगूट पंचायत वाठारांत सक्रीय आशिल्ल्या कथीत डान्सबार्रांतलीं 90 टक्के डान्सबार बेकायदो आसात. तांचेर थेट कारवाय करपाचे अधिकार पंचायतीक आसात. पंचायतीन फक्त फुडाकार घेवचो. थळाव्या लोकांनीच ही सुवात चड चड पयशांचे आशेन संबंदितांक चलोवपाक दिल्या. थळाव्या लोकांनी आनी पंचायतीन एकवट दाखयल्यार गांवांतले 80 टक्के डान्सबार आपसूक बंद जातले, अशें स्पश्ट मत कळंगूटचे आमदार मायकल लोबो हांणी उक्तायली.
कळंगूटे चलिल्ल्या डान्सबार, ड्रग्ज, शिंदळकी वेवसाय तशेंच हेर बेकायदो गजालीं आड थळावे तरणाटे आनी लोकांनी आयतारा सांजे वेळार गांवांत मूक मोर्चो काडलो. हे निशेध फेरींत आमदार लोबो हांचे सयत कळंगूट पंचायत मंडळ आनी लोकांनी व्हड संख्येन वांटो घेतिल्लो. कांदोळेंच्या जांभळेश्वर देवळा कडल्यान ह्या मूक मोर्चा रॅलीक सुरवात जाली आनी बागा दर्यादेगेर तिचें सभेंत रुपांतर जालें. हे सभेंत आमदार लोबो उलयताले. ह्या वेळार कळंगूटचे सरपंच जोजफ सिक्वेरा, पंच तशेंच शेंकड्यांनी तरणाट्यांनी वांटो घेतिल्लो.
कथीत डान्सबार्रांची सुवात ही थळाव्या लोकांचीच आसा. तांणीच संबंदितांक ती भाड्याक दिल्या. थळाव्या लोकांक सांगून ह्यो बेकायदो गजाली बंद करपाचो यत्न करुंया. ते आयकना जाल्यार गांवच्या लोकांनी एकवटीत जावन तीं मोडून उडोवया. ते खातीर आपलो पंचायतीक पुराय तेंको आसतलो, अशें आमदार लोबो हांणी सांगलें.
2015 त आपूण पीडीए अध्यक्ष आसतना अशा डान्सबार्रेंर कारवाय केल्ली. तेन्ना तीन डान्सबार आमी कायदेशीर तरेन मोडिल्ले. सध्या कळंगूटे डान्सबार चलिल्ल्याचें दिसता. थंय लोकांक फटयतात तेचवरी तांकां मारपेट लेगीत करतात, असो आरोप आमदार लोबो हांणी केलो. डान्सबार्रा खातीर भाड्याक दिल्ले सुवाते खातीर जमीन धनयाक पांच ते आठ लाख रुपया मेळटात. हे खातीर थळाव्या लोकांनी तांकां विस्वासांत घेवन ह्या डान्सबार्रांचो गांवाचेर जावपी वायट परिणाम सांगचे. ही येवजण चालीक लायली जाल्यार उण्यांत उणे सात डान्सबार आपसूक बंद जातले. कळंगूटे सध्या सुमार 14 डान्सबार सक्रीय आसात, असो दावो आमदार लोबो हांणी केलो.
आपल्याक दिल्लींतल्यान फोनः सरपंच सिक्वेरा
कळंगूटचे कथीत डान्सबार बंद करपाची आपली मोख आसा. गांवांत बेकायदो गजालींक खंयचेच स्थितींत आलाशिरो मेळपाक जायना. ह्यो वायट गजाली गांवांतल्यान ना करचे खातीर तरणाट्यांनी फुडाकार घेतला. ह्या डान्सबार्रां आड आवाज काडिल्ल्यान आपल्याक सध्या दिल्लींतल्यान खूब फोन येवपाक लागल्यात. पूण आपलो गांवाचेर खूब मोग आसा आनी कळंगूटेक ह्या वायट गजालीं पासून मुक्त करचे खातीर हें पावल उखलिल्ल्याचें तांकां आपणें दिल्लीकारांक नेटान सांगलां, अशें गुपीत ह्या वेळार कळंगूटचे सरपंच जोजफ सिक्वेरा हांणी उक्तें केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
