भांगरभूंय | प्रतिनिधी
तुमी ट्विटरचे व्हेरिफाइड युजर (ब्ल्यू टिक) आसल्यार म्हयन्याक सुमार 1600 रुपया फारीक करचे पडटले. ‘ब्ल्यू टिक’ खातें प्रमाणीत करता. आतां मेरेन तें फुकट आशिल्लें. तुमच्या फाॅलोव्हरांचो आंकडो वाडलो काय तें मेळटालें वा लोकप्रीय मनशाक. आतां ट्विटर ह्या सोशल मिडिया प्लॅटफॉर्माचे नवे धनी, उद्देगपती एलन मस्क हांणी व्हेरिफिकेशन प्रक्रियेंत म्हळ्यार प्रोफायलाक ब्ल्यू टिक दिवपाची प्रक्रिया बदलपाचो संकेत दिला. पूण, नवे प्रक्रिये संबंदी म्हायती दिवंक ना. खरें म्हणल्यार
एका वापरप्यान एलन मस्काक ट्विटराचेर विचारलें, ताचे फॉलोअर्स खूब आसले तरी
ताका ब्ल्यू टिक मेळूंक ना. ताका जाप दितना मस्कान ब्लू टिक खातीर शुल्क घेवपाचो संकेत दिलो.
‘द व्हर्ज’ च्या अहवाला प्रमाण, ट्विटर ब्ल्यू सबस्क्रिप्शना खातीर वापरप्यांक दर म्हयन्याक 19.9 डॉलर (सुमार 1,640 रुपया) फारीक करचे पडटले. पयलींच खातें व्हेरिफाय आशिल्ल्यांक 90 दिसां भितर सबस्क्रिप्शन घेवचें पडटलें नाजाल्यार ब्ल्यू टिक काडून उडयतले. सबस्क्रिप्शनात संपादन (एडिट) आनी पूर्ववत (अन डू) सयत जायतीं खाशेलपणां मेळटलीं.
मजगतीं, भारताचे म्हायती तंत्रज्ञान राज्यमंत्री राजीव चंद्रशेखरान सांगलें, ट्विटरान ब्ल्यू टिक खातीर शुल्क घेतले अशें अजून जाहीर करूंक ना. आतां व्हेरिफिकेशन प्रक्रिया सुदारपाचेर लक्ष केंद्रीत करतले, अशें अहवालांत म्हणलां. व्हेरिफिकेशन प्रक्रिया सुदारपा खातीर अभियंत्यांक 7 नोव्हेंबर मेरेनची मुजत दिल्या.
ट्विटर ब्ल्यू हें सुमार एका वर्सा आदीं सुरू जालें. कांय प्रकाशकांचे लेख जाहिरातमुक्त पळोवपाची वेवस्था करप हो ताचो हेतू आशिल्लो. हेर बदल करपाचो हेतू म्हणूनय तें सुरू केल्लें. मस्काक ट्विटराचो औपचारीक रितीन ताबो घेवन सप्तक लेगीत जावंक ना. मजगतीं, कंपनीचे आदले सीईओ पराग अग्रवाल, सीएफओ नॅड सहगल आनी धोरण मुखेल विजया रेड्डी सयत जायत्या वरिश्ठ कार्यकारी अधिकाऱ्यांक तांणी नोकरी वयल्यान काडिल्ल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.