भांगरभूंय | प्रतिनिधी
काणकोणां तरणाट्याक मरण
भांगरभूंय । प्रतिनिधी
काणकोणः सोमारा मध्यानरातीर 1 वराच्या सुमाराक गांवडोंगरी जाल्ल्या अपघातांत मूळ कर्नाटक आनी सध्या न्यूवाडो भाटपाल वाठारांत रावपी पुंडलीक लक्ष्मण काकडे (20) हाका मरण आयलें.
आयतारा रातीं पुंडलीक काकडे, रोहीत रुपेश नायक (19, रा. पणसुले, काणकोण) आनी गणेश शंकर दोड्डामनी (26. रा. मैथळ, श्रीस्थळ) हे तरणाटे कर्वे गांवडोंगरीच्या आपल्या एका इश्टाक पावोवपाक गेल्ले. वतना डबल सीट जाल्लयार कर्वेच्या इश्टाक पावोवन येतना ट्रिपल सीट येताले. गांवडोंगरी वोल्तार पावताच तांची पल्सर एनएस रस्त्याचे कुशीक गेली आनी झाडाचेर नेटान आदळ्ळी. ह्या धपक्यान पुंडलीक काकडे गंभीर जखमी जालो. तशेंच रोहीत नायक आनी गणेश दोड्डामनी जखमी जाले. पुंडलीक काकडे हाका काणकोण हॉस्पिटलांत दाखल केलो तेन्ना दोतोरांनी ताका आदींच मरण आयिल्ल्याचें घोशीत केलें. ताचे कुडीचो पोस्टमार्टम केले उपरांत ती कूड ताच्या घरच्यांचे सुवादीन केली.
पुंडलीक काकडेची कूड कर्नाटकांतल्या गदग शिंटालौर व्हेल्या. जाल्यार रोहीत नायक हाचेर जिल्हो हॉस्पिटलांत उपचार चालू आसात, अशी म्हायती काणकोण पुलीस स्टेशनाचे निरिक्षक चंद्रकांत गांवस हांणी दिली.
पुंडलीक काकडे हो खाजगी गाडी चलोवपाचें काम करतालो. जाल्यार ताचे आवय- बापूय घराघरांनी वचून आयदनां विकपाचो वेवसाय करतात. रोहीत नायक हाचो बापूय कांय वर्सां आदीं अंतरला. ताची आवय काणकोण चावडी बाजारांत खाद्यपदार्थाचो गाडो चलयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
