ट्रिगर आेडिल्ल्यान सर्व्हिस रिव्हॉल्वरांतल्यान सुटली गुळी

भांगरभूंय | प्रतिनिधी

बायल गंभीर जखमी, गोमॅकाँत उपचारा खातीर दाखल

म्हापशेंः आयआरबीचे पुलीस उपनिरिक्षक धणू बांगाटी हे घरा आशिल्ले कडेन बायलेन उमळशीकेन सर्व्हीस रिव्हॉल्वर पळयतना ट्रिगर ओडिल्ल्यान गुळी सुटून ती गंभीर जखमी जाली. गौरी धनू (पिराय 24 वर्सा) बांगाटी अशें तिचें नांव. ती सर्वेवाडो शिरी रावताली. ह्या प्रकरणांत म्हापशें पुलिसांनी तिचो घोव आशिल्ले आयआरबीचे पुलीस उपनिरिक्षक धणू बांगाटी हांचे आड घाळपणाचो गुन्यांव नोंद केला.

जखमी गौरी हिणें आपूण घरांतली नितळसाण करतना आपले कडल्यान पिस्तुलाचो ट्रिगर ओडिल्ल्यान तातूंतल्यान गुळी सुटून ती जखमी जाल्ल्याचो जबाब दिला. ते प्रमाण पुलिसांनी भा.दं.सं. च्या कलम 338 प्रमाण गुन्यांव नोंद केला.

ही घडणूक मंगळारा 5 वेर रातीं सर्वेवाडो गिरी घडली. उपनिरिक्षक आशिल्ल्या घोवाचें पिस्तूल उमळशिकेन तिणें घेतिल्लें, पूण पिस्तुलाचो ट्रिगर ओडिल्ल्यान तिका गुळी लागली. गुळी दाव्या हाताच्या मनगटांतल्यान आरपार जावन दावे मांडयेक लागली. हातूंत तिचे मनगट आनी मांडयेचें हाड मोडलां, तिचेर गोमॅकाँत उपचार सुरू आसात.

बांगाटी हांच्या एक माळयेच्या घरांत ही दोगांय रावतात. घडणुके वेळार उपनिरिक्षक धणू बेडरुमांत आशिल्ले, जाल्यार गौरी हालांत जमनीचेर बसून पिस्तूल हातांत घेवन उमळशिकेन पळयताले. पूण चुकून तिणें ट्रिगर ओडिल्ल्यान गुळी सुटली. गुळयेचो आवाज आयले उपरांत उपनिरिक्ष धणू बेडरुमांतल्यान धांवन हॉलांत आयले तेन्ना हो प्रकार तांचे नदरेक पडलो.

​ताणें तिका बेगोबेग आपल्या मोटारींतल्यान म्हापश्यां जिल्हो हॉस्पिटलांत उपचारा खातीर दाखल केली. थंयच्यान दोतोरांनी फुडल्या उपचारा खातीर तिका गोमॅकाँत धाडले. फुडलो तपास म्हापशें पुलीस करतात.