भांगरभूंय | प्रतिनिधी
ई पावणीच्या म्हालाक लागून ट्रक लागतले धांवपाक
खण वाठारांत परतून वेव्हार जातले सुरू
सुभाष फळदेसाय हांची पत्रकार परिशदेंत म्हायती
पणजी : खण लिजांचेर आशिल्ल्या 20 दशलक्ष टन म्हालाचे ई पावणेक लागून ट्रक वेवसाय रोखडोच सुरू जावप शक्य आसा. ई पावणी म्हालाचे येरादारीक लागून ब्लॉकाची पावणी जावचे पयलीं ट्रक वेवसाय सुरू जातलो अशी म्हायती समाज कल्याण खात्याचे मंत्री सुभाष फळदेसाय हांणी दिली.
केंद्रान 58 ग्रेडी सकयल्या खण म्हाला वेलो निर्गत शुल्क रद्द केला. गोंय सरकारान लिजांचे ब्लॉक केल्या. चार ब्लॉकांचे पावणेची प्रक्रिया सुरू जाल्या. ब्लाॅकांची पावणी जातकूच उत्खनन सुरू जातलें. हाका जरी वेळ लागलो तरी सध्या लीज वाठारांत जो म्हाल आसा, ताची येरादारी करपाक हरकत ना. 20 दशलक्ष टन म्हालाची येरादारी रोखडीच सुरू जातली. हाका लागून ट्रकांक आनी बार्जीक काम मेळटलें. ट्रकांचे येरादारीक लागून खण वाठारांत परतून वेव्हार सुरू जातले अशें मंत्री सुभाष फळदेसाय हांणी सांगलें.
समाज कल्याण खात्याचे मंत्री तशेंच सांगेंचे आमदार सुभाष फळदेसाय हांणी भाजप कचेरेंत सांजे पत्रकार परिशद घेतली. ह्या वेळार जिल्हो पंचायत वांगडी गोपाळ सुर्लकार हाजीर आशिल्ले. गोंयांत लो ग्रेडीचो म्हाल मेळटा. चडसो म्हाल 58 ग्रेडी सकयलो आसता. इतलो तेंप लो ग्रेड म्हालाचेर निर्गत शुल्क आशिल्लें. हाका लागून ई पावणीच्या म्हालाची निर्गत जावपाक आडखळ येताली. निर्गत शुल्काक लागून लो ग्रेड म्हाल निर्गत करपाक परवड नाशिल्लो. हाका लागून लीज वाठारांतलो म्हाल तसोच उरलो अशें तांणी सांगलें.
केंद्र सरकारान लो ग्रेड म्हाला वेले निर्गत शुल्क रद्द केलां. हाचो खूबसो लाव गोंयाक जातलो. लीज वाठारांत अदमाशेक 20 दशलक्ष टन म्हाल आसा. हो म्हाल लो ग्रेड आसा. ई पावणी जाल्ल्या ह्या म्हालाचे निर्गतीक गती मेळटली. लीज वाठारांतले जेटीचेर म्हाल पावोवपाक लागून ट्रकांक काम मेळटलें. 20 दशलक्ष टन म्हालाक लागून ट्रकांक दोन हंगामा मेरेन काम मेळप शक्य आसा. ट्रकां सयत बार्जींकूय काम मेळटलें. जेटी वेल्यान मुरगांव बंदरांत म्हाल हाडपा खातीर बार्जींचो वापर जातलो, अशें सुभाष फळदेसाय हांणी सांगलें.
ब्लॉकाचे पावणे पयली ट्रक येरादारी
पयल्या पांवड्यार चार ब्लॉकांची पावणी जातली. पर्यावरण दाखले, प्रदुशण नियंत्रण मंडळा कडल्यान प्रमाणपत्र मेळोवपा खातीर थोडो उशीर जावप शक्य आसा. हाचे पयली ई पावणेच्या म्हालाक लागून ट्रकांची येरादारी सुरू जातली. उत्खनन सुरू जालें ना तरी ट्रकांक काम मेळटलें. ट्रक वेवसाय सुरू जालो काय गॅरेजी, दुकानां, हॉटेलां सुरू जातलीं. ट्रक चालक, क्लीनर हांकां काम मेळटलें. लिजांचेर जो म्हाल आसा, तो हालयले बगर उत्खनन करप शक्य जावचें ना. हाका लागून लीज वाठारांतलो म्हाल खाली जावपाची गरज आसा अशें मंत्री फळदेसाय हांणी सांगलें.
इतलो तेप निर्गत शुल्काक लागून म्हालाची निर्गत जायनासली. हाका लागून ई पावणेक लेगीत उणो प्रतिसाद मेळिल्लो.
भौशीक बांदकाम खात्याचे मंत्री निलेश काब्राल हांची मुख्यमंत्री डॉ. प्रमोद सावंत हांचे कडेन बसका जाल्या. सांगेंचो आमदार ह्या नात्यान हांव बसकेक हाजीर आशिल्लों. ट्रक धनयांक तरेकवार शुल्कांत सवलत दिवपाक मुख्यमंत्री डॉ. प्रमोद सावंत हांणी तयारी दाखयल्या. हे विशींचो निर्णय रोखडोच जातलो अशी आस्त मंत्री सुभाष फळदेसाय हांणी उक्तायल्या.
हरीत शुल्क रद्द करपाची मागणी ट्रक धनयांनी बसकेंत केल्ली. ही मागणी मान्य जातली, असो विस्वास मंत्री सुभाष फळदेसाय हांणी उक्तायलाे.
ट्रकांक शुल्कांत मेळटली सवलत
खणी बंद आशिल्ल्या कारणान ट्रक वेवसाय फाटलीं कांय वर्सां बंद आसा. ट्रक बंद आशिल्ल्यान रस्त्याच्या शुल्कात सूट मेळटलीच. ते भायर ट्रकांक हरीत शुल्क भरचे पडटा. हें शुल्क वर्साक 18 हजार जाता. ट्रकांक थारावीक वर्सां जाली काय हें शुल्क भरचें पडटा. ह्या शुल्कांत 50 टक्क्यां परस चड सवलत मेळटली. खण वेवसाय तेजीत आशिल्लो तेन्ना खूबशा जाणांनी ट्रकांची खरेदी केल्ली. 2012 वर्सा सगल्यांत पयली खण वेवसाय बंद जालो. हाचे उपरांत 2018 वर्सा तो परतून बंद जालो. चडशे ट्रक आतां पोरणें जाल्यात. हाका लागून तांकां हरीत शुल्क भरचें पडटलें. हरीत शुल्कांत ट्रकवाल्यांक सवलत मेळटली.
कांय म्हयन्यां पयलीं जाल्ल्या सगल्या राज्यांच्या खण मंत्र्यांचे परिशदे खातीर मुख्यमंत्री डॉ. प्रमोद सावंत हांणी म्हाका धाडिल्लो. हे परिशदेंत लेगीत 58 ग्रेड खाला खनीज म्हालाच्या निर्याती वयलो कर फाटीं घेवपाचो मुद्दो आपणें लावन धरिललो अशें मंत्री सुभाष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
